Keflvíkingar töpuðu naumlega fyrir Val

Keflvíkingar léku frábæran fótbolta í kvöld þegar þeir tóku á mót Val í Bestu deild karla – gestirnir komust yfir í fyrri hálfleik og því miður náðu heimamenn ekki að svara í sömu mynt og leiknum lauk með eins marks sigri gestanna. Ósanngjörn úrslit en jákvæð frammistaða hjá Keflavík.

Keflvíkingar báru enga virðingu fyrir gestunum og mættu alls óhræddir til leiks í annarri umferð Bestu deildar karla. Það voru heimamenn sem voru mun hættulegri í leiknum og því var það gegn gangi leiksins þegar Valsmenn skoruðu á 40. mínútu. Virkilega svekkjandi en markið kom eftir hornspyrnu, vörnin gleymdi sér eitt augnablik og var refsað fyrir.

Í seinni hálfleik bættu Keflvíkingar í sóknarleikinn og skapaðist við það enn meiri hætta upp við mark gestanna en vantaði aðeins herslumuninn upp á að dauðafæri sköpuðust. Allan seinni háfleik var einstefna að marki Vals en þeri stóðu af sér hverja sóknina af annarri og héldu hreinu.

Keflavík er því á stiga eftir tvær umferði og mæta Íslandsmeisturum Víkings á útivelli í næstu umferð. Haldi liðið áfram að spila svona gæti allt gerst í þeim leik.

Páll Ketilsson ræddi við Sigurð Ragnar Eyjólfsson, þjálfara Keflavíkur, og Sindra Kristinn Ólafsson, markvörð Keflvíkinga, eftir leikinn og má sjá þau í spilara hér að neðan. Jóhann Páll Kristbjörnsson, ljósmyndari Víkurfrétta, mundaði myndavélina og má sjá afraksturinn í myndasafni neðst á síðunni.

Keflavík - Valur (0:1) | Besta deild karla 24. apríl 2022