Blær bangsi kom í Stapaleikskóla með samfélagslögreglunni

Það ríkti sannkölluð hátíðarstemning í Stapaleikskóla þegar samfélagslögreglan kom í heimsókn til yngstu nemendanna. Lögreglumennirnir komu færandi hendi og gáfu börnunum bangsa sem nefnist Blær, táknmynd vináttunnar í forvarnarverkefni Barnaheilla gegn einelti.

Heimsóknin var liður í því að efla tengsl lögreglu við ungt fólk og færa hana nær samfélaginu. Markmiðið er að byggja upp traust og jákvæð tengsl frá unga aldri, þannig að börnin finni fyrir öryggi og treysti sér til að leita til lögreglunnar ef þau þurfa á aðstoð að halda. Frá þessu er greint á vef Reykjanesbæjar.

Vinátta og góð gildi

Blær og litlir hjálparbangsar sem hver nemandi fékk í fangið minna á mikilvægi vináttu og samstöðu. Verkefnið byggir á fjórum megin gildum:

• Umburðarlyndi, að viðurkenna fjölbreytileikann og koma fram við aðra af virðingu.
• Virðing, að taka tillit til allra í hópnum og virða ólíkt hátterni.
• Umhyggja, að sýna áhuga, samkennd og hjálpsemi.
• Hugrekki, að þora að láta í sér heyra og bregðast við óréttlæti.

Hver nemandi á sinn bangsa sem geymdur er í leikskólanum og verður hluti af daglegu starfi þar til þau útskrifast. Þá fá börnin að taka Blæ með sér heim sem minningu um vináttu og góða samveru.

Gleði og traust vinátta

Börnin tóku á móti heimsókninni með gleði og sýndu Blæ strax mikinn áhuga. Þegar lögreglan kvaddi voru margir litlir bangsar komnir í faðmlag og ljóst að Blær átti þegar nýja og trausta vini í Stapaleikskóla.

Reykjanesbær fagnar verkefnum sem þessum sem leggja grunn að góðum gildum og efla samfélagsanda til framtíðar, segir í fréttinni á vef bæjarins.