Safnahelgi á Suðurnesjum búin að festa sig kyrfilega í sessi

Safnahelgi á Suðurnesjum hefur verið við lýði allt frá árinu 2009 og hefur verkefninu stöðugt vaxið fiskur um hrygg og um helgina fer Safnahelgin 2025 fram. Kynningarfundur var haldinn í Grindavík þriðjudaginn 7. október, í Gula húsinu svokallaða en það hefur verið félagsheimili knattspyrnudeildar UMFG síðan húsið var reist árið 1986. Segja má að Gula húsið sé búið að vera olnbogabarn í Grindavík undanfarin ár en nú er búið að finna húsinu nýtt og göfugt hlutverk, það mun hýsa ferðafólk sem kemur til Grindavíkur og verður m.a. hægt að horfa á stuttmynd um sögu hamfaranna, sem grindvíski kvikmyndagerðarmaðurinn Óskar Kristinn Vignisson vann.

Ásrún Kristinsdóttir er forseti bæjarstjórnar Grindavíkur, hún lítur á Safnahelgi á Suðurnesjum árið 2025, sem merk tímamót í upprisu Grindavíkurbæjar.

„Ég er mjög ánægð að vera hér í Gula húsinu í dag en við höfum grínast með að það hefur verið nett olnbogabarn hér í Grindavík en sem betur fer er búið að finna húsnæðinu gott verkefni til framtíðar. Hugmyndin kemur í raun út frá samstarfsverkefni nokkurra aðila, landslagshönnuða og -arkitekta. Þegar vinna hófst við að skipuleggja hvernig við getum tekið á móti ferðamönnum og ákveðinn hringur ferðamannsins myndaður, benti einn arkitektanna á að Gula húsið væri tilvalinn upphafspunktur. Hér verður hægt að sjá stuttmyndina um hamfarirnar sem Óskar Kristinn gerði, hér verður hægt að bjóða upp á veitingar og ferðamaðurinn getur skipulagt ferðalag sitt um Grindavík hér í Gula húsinu. Gula húsið geymir hluta sögu Grindavíkur og er frábært að það þjóni öðruvísi tilgangi í framtíðinni. Það er frábært tækifæri að opna þetta á Safnahelginni og hvet ég hér með alla Suðurnesjabúa og aðra gesti, til að renna til Grindavíkur og sjá það sem fyrir augu ber,“ sagði Ásrún.

Safnahelgi á Suðurnesjum síðan 2009

„Þetta er skemmtilegt samstarfsverkefni sveitarfélaganna á Suðurnesjum, öll söfn verða opin, aðgangur er ókeypis og vonandi munu sem flestir kíkja á okkur yfir helgina,“ segir Eggert Sólberg Jónsson, sviðsstjóri frístunda- og menningarsviðs Grindavíkurbæjar.

„Þessi helgi hefur verið haldin síðan 2009, við Grindvíkingar gátum verið með í fyrra en það stóð tæpt, bærinn var bara nýopnaður og við gátum boðið upp ljósmyndasýningu frá hamfaratímanum á planinu við Festi og sú sýning stendur enn. Í ár erum við mjög stolt yfir að geta boðið upp á sýningu í Gula húsinu sem flestir tengja við fótboltann, húsið breytist að hluta í bíósal og erum við spennt að sýna myndina sem Óskar Kristinn vann um áhrif hamfaranna á líf Grindvíkinga. Myndin hefur farið víða um heiminn en er fyrst núna komin í almenna sýningu.“

Breyta almenningsálitinu

Eggert hefur trú á að umræðan um Grindavík muni breytast og er bjartsýnn á framtíð bæjarins.

„Grindavík hefur iðað af lífi í sumar, fjölmargir viðburðir haldnir og fjöldi erlendra ferðamanna hefur verið mikill. Ég myndi vilja sjá landa mína gefa Grindavík betri gaum og vonandi fer öll umræða að vera bara á jákvæðum nótum. Það er búin að vera umræða eftir sjónvarpsþátt á dögunum en ég held að margir Íslendingar viti ekki hvernig staðan er í Grindavík og því hvet ég alla til að kíkja til okkar í heimsókn og sjá sjálf hvernig staðan er. Í leiðinni minni ég á fjölmargar flottar sýningar á Safnahelginni annars staðar á Suðurnesjum. 

Á vefnum safnahelgi.is má sjá fjölbreytt úrval viðburða sem verða í boði á safnahelginni 11.-12. október.