Safnahelgi á Suðurnesjum 11.–12. október - opnuð með stuttmynd um Grindavík

Margt verður á boðstólum helgina 11.–12. október þegar Safnahelgi á Suðurnesjum fer fram. Þá bjóða sveitarfélögin á Suðurnesjum landsmönnum að heimsækja fjölbreytta flóru safna, setra og sýninga, þar sem allir ættu að finna eitthvað við sitt hæfi.

Sérstakur opnunarviðburður og kynningarfundur Safnahelgar verður haldinn þriðjudaginn 7. október kl. 10:00 í Gula húsinu við íþróttamannvirkin í Grindavík. Þar verður sýnd stuttmynd sem dregur upp mynd af áhrifum hamfaranna á líf íbúa bæjarins. Ásrún Helga Kristinsdóttir, forseti bæjarstjórnar Grindavíkur, opnar Safnahelgina formlega og Eggert Sólberg Jónsson, sviðsstjóri frístunda- og menningarsviðs Grindavíkur, kynnir hugmyndir um uppbyggingu viðkomustaða fyrir ferðamenn.

Alla dagskrá má nálgast á safnahelgi.is. Meðal viðburða má nefna fjölbreyttar sýningar og leiðsagnir um öll Suðurnes, ljóðaupplestur, myndlistarsýningar og fjölskylduvæna dagskrá fyrir börn.

 Fulltrúar sveitarfélaganna á Suðurnesjum hafa unnið sameiginlega að undirbúningi og er verkefnið styrkt af Uppbyggingarsjóði Suðurnesja.

Aðgangur að Safnahelginni er ókeypis og eru gestir hvattir til að taka fjölskylduna með sér í ferðalag um svæðið og uppgötva það sem söfn, setur og sýningar á Suðurnesjum hafa upp á að bjóða.