Aukatónleikar af 80 ára afmælistónleikum Rúnna Júl í haust
Aukatónleikar af „Rúnni Júl 80 ára afmælistónleikar“ fara fram í Stapa 19. september. Miðasala er hafin.
Synir Rúnars Júlíussonar heiðra minningu Herra Rokk sem hefði orðið 80 ára þann 13. apríl 2025. Um aukatónleika er að ræða en færri komust að en vildu á fyrstu tónleikana.
Í boði verður ógleymanleg kvöldstund þar sem ferill rokkskáldsins verður rakinn með tónlist og fleygum sögum af Rúnari og samferðarmönnum hans. Ekkert verður dregið undan í frásögnum og flutningi þar sem hinar ýmsu hliðar eins mesta töffara íslenskrar rokksögu verða kynntar á einlægan og hreinskiptinn hátt.
Einvala lið hljóðfæraleikara munu verða bræðrunum Baldri og Júlíusi til stuðnings á þessum tónleikum sem munu örugglega ekki klikka.
