HMS
HMS

Íþróttir

Njarðvík í samstarf við spænska körfuknattleiksliðið Paterna
Stúlknaflokkur Njarðvíkur tímabilið 2021–2022. Mynd af vef UMFN
Jóhann Páll Kristbjörnsson
Jóhann Páll Kristbjörnsson skrifar
mánudaginn 15. nóvember 2021 kl. 08:21

Njarðvík í samstarf við spænska körfuknattleiksliðið Paterna

Unglingaráð körfuknattleiksdeildar Njarðvíkur hefur hafið vinasamstarf við körfuknattleiksfélagið Paterna frá Spáni. Ungmennalið Paterna heimsækir Njarðvík í desembermánuði. Njarðvíkingurinn Rannveig Guðmundsdóttir leikur með ungmennaliði Paterna og mun því heimsækja uppeldisklúbbinn sinn ásamt liðsfélögum sínum frá Spáni. 

Guðmundur Helgi Albertsson, varaformaður unglingaráðs Njarðvíkur, hefur haft veg og vanda að undirbúningi samstarfsins fyrir hönd Njarðvíkur. Hann segir verkefnið fjölþætt en eitt af meginmarkmiðum þess sé að sporna við brottfalli ungra kvenna úr körfuknattleiksíþróttinni. Frá þessu er greint á vef UMFN.

„Við hjá Njarðvík og líka í öðrum félögum höfum orðið vör við brottfall ungra kvenna úr boltanum og viljum sporna við því. Ég hef persónulega verið í miklum samskiptum við Paterna vegna veru dóttur minnar þar og fannst það góð hugmynd að koma á samstarfi milli klúbbanna,“ sagði Guðmundur en aðalmarkmiðið er að deila reynslu sem og að mynda tengingar við nám og spilamennsku ungmenna erlendis.

Bílaverkstæði Þóris
Bílaverkstæði Þóris

„Unglingaráð félagsins telur það mikilvægt að hafa spennandi verkefni á þessu stigi sem er stúknaflokkur og það var ánægjulegt að sjá hve vel forsvarsmenn Paterna tóku í verkefnið,“ sagði Guðmundur en því fer fjarri að um þessa einu heimsókn sé að ræða.

„Hér er á ferðinni langtímasamstarf klúbbanna og því mun stúlknaflokkur Njarðvíkur heimsækja Paterna á Spáni á næstu leiktíð og þannig munu félögin skiptast á heimsóknum. Guðmundur og unglingaráð hafa staðið að undirbúningi þessa stóra verkefnis og það hefur verið einstaklega gaman að sjá hvað nærsamfélagið okkar hefur tekið vel í samstarfsbeiðnir og allir boðnir og búnir til þess að hjálpa til,“ sagði Logi Gunnarsson, yfirþjálfari yngri flokka Njarðvíkur.

Sjálft verkefnið snýst um sameiginlegar æfingar og svo munu stúlknaflokkur Njarðvíkur og ungmennalið Paterna mætast í tveimur æfingaleikjum.

Tengdar fréttir