Grindavík með nauman sigur gegn Ármanni í 16-liða úrslitum VÍS-bikarsins

Grindavík mætti Ármanni öðru sinni á fáeinum dögum en liðin mættust í deildarkeppninni á fimmtudagskvöld og þá hafði Grindavík tiltölulega öruggan sigur. Þess vegna áttu eflaust margir von á öðrum auðveldum sigri en því fór víðs fjarri, leikurinn var í járnum og hefði ekki mikið þurft að breytast á lokamínútunum svo úrslitin hefðu orðið önnur. Lokatölur, 86-77 eftir að staðan í hálfleik hafði verið 49-37.

Grindvíkingar mættu greinilega frekar værukærir til leiks og var aðalsmerki þeirra í vetur, vörnin, víðs fjarri á löngum köflum í leiknum og eins og Jóhann Þór, þjálfari, sagði að leik loknum, hans menn voru bara á 30% afköstum lengst af og þá er oft von á illu.

Jordan Semple skilaði eins og oft áður í vetur, mestu framlagi. Hann endaði með 21 og tók 17 fráköst. Daniel Mortensen skoraði 20 og tók 8 fráköst og fyrirliðinn Ólafur Ólafsson, skoraði 15 stig og tók 4 fráköst.

Grindavík því komið í 8-liða úrslit og í kvöld kemur í ljós hvort Keflvíkingar verði hitt liðið þegar dregið verður í 8-liða úrslitum, þeir mæta ÍA á útivelli í kvöld en Njarðvíkingar féllu út í 32-liða úrslitum, töpuðu þá fyrir Álftanesi.