Sjúkraflutningum fjölgaði um 3% og útköllum slökkviliðs um þriðjung

Brunavarnir Suðurnesja sinntu 4.101 sjúkraflutningi á árinu 2025, samanborið við 3.968 flutninga árið 2024. Það jafngildir 3% aukningu milli ára. Af heildarfjöldanum voru 1.235 forgangsflutningar.

Þrátt fyrir aukinn heildarfjölda hélt flutningum til Reykjavíkur áfram að fækka. Á árinu 2025 voru 776 flutningar frá sveitarfélögum á Suðurnesjum til Reykjavíkur, samanborið við 781 árið 2024. Til samanburðar voru slíkir flutningar 1.027 árið 2023.

Samkvæmt Brunavörnum Suðurnesja má rekja þessa þróun meðal annars til verulegra umbóta á aðstöðu og teymisvinnu hjá Heilbrigðisstofnun Suðurnesja (HSS), sem hafi dregið úr þörf fyrir flutninga á höfuðborgarsvæðið.

Útköll slökkviliðs jukust um 35%

Slökkvilið Brunavarna Suðurnesja sinnti 316 verkefnum á árinu 2025 en þau voru 234 árið 2024. Það er 35% aukning milli ára. Af útköllunum voru 129 forgangsútköll.

Meðal stærri verkefna ársins var bruni í timburhaug hjá Íslenska Gámafélaginu. Þar kviknaði tvisvar í timbri á geymslusvæðinu yfir sumartímann og þurfti slökkviliðið að vera með umfangsmikil viðbrögð, auk öryggisvakta samhliða slökkvistarfi.

Þá komu upp tveir stórir brunar á Ásbrú, annars vegar í Klettatröð og hins vegar í Kliftröð. Í brunanum í Klettatröð nýtti slökkviliðið dróna með hitamyndavél með góðum árangri. Með hitamyndunum var hægt að greina hita og eld undir þökum án þess að senda reykkafara inn í byggingu með hitamyndavél, sem annars hefði verið talið nauðsynlegt.

Menntun og endurmenntun efld

Mikil áhersla var lögð á menntun starfsfólks í sjúkraflutningum á árinu. Fjórir starfsmenn luku framhaldsmenntun og aðrir fjórir hófu nám í framhaldsmenntun.

Þá sneru tveir starfsmenn heim frá Bandaríkjunum eftir að hafa lokið bráðatæknimenntun, sem ekki er kennd á Íslandi. Nú starfa níu bráðatæknar hjá Brunavörnum Suðurnesja og fimm starfsmenn eru í námi eða að hefja nám til bráðatækni.

Einnig var lögð mikil áhersla á endurmenntun alls starfsfólks, þar á meðal sérstakt átak í sérhæfðri endurlífgun barna, í samstarfi við HSS.

Nýir í varaliði og nýr köfunarhópur

Nýir aðilar komu inn í varalið Brunavarna Suðurnesja um áramótin 2024/2025 og hélt menntun þeirra áfram á árinu. Þar á meðal luku þeir grunnnámi 1 og 2.

Árið 2025 luku fjórir starfsmenn framhaldsnámi í slökkviliðsfræðum og fjórir hófu framhaldsnám undir lok árs.

Einnig var á árinu stofnaður köfunarhópur en Brunavarnir Suðurnesja höfðu ekki haft slíkan hóp áður. Þrír starfsmenn luku köfunarnámi og eru komnir á viðbragðslista. Alls eru nú fjórir kafarar innan raða Brunavarna Suðurnesja og stefnt er að því að efla hópinn enn frekar á árinu 2026.