Framlög til Voga lækka um 66 milljónir og óvissa í rekstri

Um þriðjungur tekna bæjarsjóðs Sveitarfélagsins Voga eru framlög úr Jöfnunarsjóði sveitarfélaga. Þegar liggur fyrir að þessi framlög verða skert um 12,5% á þessu ári, sú skerðing hefur í för með sér u.þ.b. 35 m.kr. tekjulækkun hjá bæjarsjóði. Nú hefur einnig verið birt áætlun sjóðsins um tekjujöfnunarframlög ársins.

„Tekjujöfnunarframlagið árið 2019 var tæpar 58 m.kr. Spáin okkar fyrir árið í ár var 60 m.kr. Nú hefur sjóðurinn birt frétt um hvert framlagið verður í ár, og okkur til mikilla vonbrigða verður það einungis 27 m.kr. Lækkunin frá fyrra ári er 31 m.kr., þannig að í heild lækka framlög Jöfnunarsjóðs 66 m.kr. milli ára. Það munar um minna. Framundan er óvissa um þróun útsvarstekna, enda óvissa mikil í atvinnumálum,“ segir Ásgeir Eiríksson, bæjarstjóri í Vogum í vikulegum föstudagspistli.

Fari svo að atvinnuleysi aukist meira en þegar er orðið, má gera ráð fyrir að tekjur einstaklinga lækki umtalsvert þegar líða tekur á haustið. Útgjöld sveitarfélagsins eru nokkurn veginn í samræmi við áætlun ársins. Framundan eru því óvissutímar í rekstri bæjarsjóðs. Allt kapp verður vitaskuld lagt á að halda áfram úti góðri þjónustu og að standa vörð um starfsemi sveitarfélagsins, segir jafnframt í pistlinum.