Hvað setjum við í forgang?

Nú stendur yfir vinna við fjárhagsáætlun Reykjanesbæjar fyrir árið 2027. Í þeirri vinnu þarf að taka mikilvægar ákvarðanir um hvernig ráðstafa skuli sameiginlegum fjármunum bæjarins. Fjárhagsáætlun snýst um meira en tölur á blaði. Hún endurspeglar það samfélag sem við viljum byggja upp.

Eftir átta ár í meirihluta þekki ég vel þær áskoranir sem fylgja því að forgangsraða fjármunum sveitarfélagsins. Það er aldrei hægt að verða við öllum óskum og því þurfa ákvarðanir að byggjast á skýrum forsendum, raunverulegri þjónustuþörf og langtímahagsmunum íbúa.

Nú sit ég í minnihluta og tel ekki síður mikilvægt að taka þátt í þeirri umræðu og leggja mitt af mörkum til vandaðrar og ábyrgrar forgangsröðunar.

Samhliða sveitarstjórnarstörfum hef ég starfað við geðrækt og velferðarþjónustu á Suðurnesjum og gegni í dag starfi forstöðumanns Bjargarinnar. Sú reynsla hefur kennt mér að stuðningur þarf að vera til staðar þegar á reynir, en ekki síður áður en vandinn verður alvarlegri. Félagsleg tengsl, virk þátttaka og tilfinningin að tilheyra skipta sköpum fyrir líðan og lífsgæði fólks.

Mér er sérlega umhugað um málefni barna og ungmenna. Mörg þeirra standa frammi fyrir áskorunum sem tengjast andlegri líðan, félagslegum tengslum og þátttöku í samfélaginu. Þess vegna þurfum við að tryggja að öll börn og ungmenni hafi raunhæf tækifæri til að taka þátt í íþrótta- og tómstundastarfi, óháð efnahag eða aðstæðum fjölskyldunnar.

Þegar við ræðum forgangsröðun fjármuna eigum við að horfa til verkefna sem geta haft raunveruleg áhrif á líf fólks. Þar má nefna Hlýjuna, sem veitir börnum og ungmennum mikilvægan stuðning, og ungmennahús þar sem ungt fólk getur átt öruggan samastað, myndað tengsl og tekið þátt í uppbyggilegu starfi.

Við þurfum einnig að leita leiða til að ná betur til þeirra barna sem standa utan skipulagðs íþrótta- og tómstundastarfs. Fjárhagur eða félagsleg staða fjölskyldu á ekki að ráða því hvort barn fái tækifæri til þátttöku. Hér er ekki aðeins um að ræða þjónustu til skemmri tíma heldur mikilvægar forvarnir og fjárfestingu í framtíðinni.

Þörfin fyrir stuðning og samfélagslega þátttöku hverfur ekki með aldrinum. Fullorðið fólk og eldri borgarar þurfa einnig úrræði sem draga úr einangrun, efla lífsgæði og styrkja tengsl við samfélagið. Forvarnir og geðrækt þurfa því að vera hluti af heildstæðri sýn á þjónustu við íbúa á öllum æviskeiðum.

Jafnframt verðum við að standa vörð um þau úrræði sem þegar hafa verið byggð upp. Það er ekki nóg að hrinda góðum verkefnum af stað ef þau fá síðan ekki þann rekstrargrundvöll sem þarf til að sinna hlutverki sínu og þróast í takt við þarfir samfélagsins.

Uppbygging mannvirkja og viðhald innviða eru mikilvæg verkefni og munu ávallt skipta máli. En samfélag verður ekki eingöngu byggt úr steinsteypu og stáli. Það byggist fyrst og fremst á fólkinu sem þar býr. Þess vegna er fjárfesting í velferð, forvörnum og jöfnum tækifærum ekki kostnaður heldur fjárfesting í sterkara samfélagi til framtíðar.

Ábyrg fjármálastjórn og öflug velferðarþjónusta eru ekki andstæður. Þvert á móti fara þessir þættir saman. Góðar forvarnir, aukin þátttaka og sterk félagsleg tengsl skila sér ekki aðeins í betri líðan heldur einnig í heilbrigðara og sjálfbærara samfélagi til lengri tíma.

Þegar við ákveðum hvað setja skuli í forgang verðum við að spyrja okkur hvaða áhrif ákvarðanir okkar hafa á líf fólks. Ég vil sjá Reykjanesbæ halda áfram að vera samfélag þar sem börn og ungmenni fá tækifæri til að vaxa og dafna og þar sem íbúar á öllum aldri geta fundið stuðning, þátttöku og samfélag þegar á þarf að halda.

Spurningin er ekki aðeins hvað við höfum efni á að gera. Spurningin er einnig hvaða framtíð við viljum byggja. Að mínu mati á sú framtíð að endurspeglast í forgangsröðun okkar.

Díana Hilmarsdóttir
Bæjarfulltrúi Framsóknar í Reykjanesbæ