Íbúum Suðurnesja fækkar lítillega – Reykjanesbær missir rúmlega 300 íbúa

Íbúum Suðurnesja hefur fækkað um 149 frá 1. desember 2025 til 1. október 2026, samkvæmt nýjustu tölum Þjóðskrár. Fækkunin nemur 0,5% en þróunin er mismunandi eftir sveitarfélögum. Íbúum Reykjanesbæjar hefur fækkað um rúmlega 300 á tímabilinu en fjölgun hefur orðið í Grindavík, Vogum og Suðurnesjabæ.

Samkvæmt tölum Þjóðskrár voru íbúar Suðurnesja 31.866 þann 1. desember 2025 en 31.717 þann 1. október 2026. Þótt íbúum svæðisins hafi fjölgað mikið á undanförnum árum sýna nýjustu tölurnar að sú þróun hefur stöðvast í bili.

Fækkar um 306 í Reykjanesbæ

Mesta breytingin er í Reykjanesbæ, fjölmennasta sveitarfélagi Suðurnesja. Þar voru íbúar 24.635 í desember 2025 en 24.329 í byrjun október 2026. Fækkunin nemur 306 íbúum, eða 1,2%, á tíu mánuðum. Þetta er athyglisverð breyting eftir mikla og nær samfellda fólksfjölgun í sveitarfélaginu undanfarin ár. Þrátt fyrir fækkunina búa enn rúmlega 24 þúsund manns í Reykjanesbæ, eða um 77% allra íbúa Suðurnesja.

Fjölgun í Suðurnesjabæ og Vogum

Í Suðurnesjabæ hefur íbúum hins vegar fjölgað um 91 frá desember 2025. Þeir voru þá 4.383 en voru orðnir 4.474 í október 2026. Það er fjölgun um 2,1%.

Í Sveitarfélaginu Vogum fjölgaði íbúum úr 1.956 í 1.994 á sama tímabili. Fjölgunin nemur 38 íbúum, eða 1,9%.

Bæði sveitarfélögin halda því áfram að stækka þótt íbúafjöldi Suðurnesja í heild hafi dregist lítillega saman.

Íbúum Grindavíkur fjölgar lítillega

Í Grindavík voru 920 íbúar skráðir 1. október 2026, samanborið við 892 í desember 2025.

Þar hefur því fjölgað um 28 íbúa, eða 3,1%, á tímabilinu. Hlutfallslega er það mesta fjölgunin meðal sveitarfélaganna fjögurra, þótt fjölgunin sé lítil í fjölda einstaklinga. Íbúafjöldi Grindavíkur er þó enn langt undir því sem hann var fyrir jarðhræringarnar og rýmingu bæjarins.