Kallar eftir teikningum af Grænáshringtorgi

Guðný Birna Guðmundsdóttir, oddviti Samfylkingar í Reykjanesbæ vill fá skýrar upplýsingar um stöðu hönnunar hringtorgs við Grænásbrekku. Hún lagði fram formlega fyrirspurn á bæjarstjórnarfundi Reykjanesbæjar 6. október og sagði ítrekað hafa verið bókað að hönnunin væri í vinnslu.

Fyrirspurnin kom í umræðu um aksturstengingu milli Njarðvíkurhafnar og Reykjanesbrautar. Í gögnunum hefði komið fram að sviðsstjóri umhverfissviðs upplýsti að hönnun hringtorgsins stæði yfir.

Guðný Birna spurði hvar vinnan stæði nákvæmlega og hvort teikningar væru til sem hægt væri að sjá. Hún óskaði einnig eftir upplýsingum um hvenær hönnuninni lyki þannig að bæjarráð og bæjarstjórn gætu fengið kynningu á útliti, stærð og staðsetningu hringtorgsins.

Hún sagði það hafa verið lengi í hönnunarferli og kvaðst hlakka til að sjá afraksturinn. Forseti bæjarstjórnar sagði svör verða veitt á næsta bæjarstjórnarfundi.

Engar teikningar eða ný verklokaáætlun voru kynntar í umræðunni 6. október.