Þungarokk í Stapa

Hljómsveitin CHÖGMA heldur þungarokkstónleika í Hljómahöll sunnudaginn 8. mars. Auk CHÖGMA munu hljómsveitirnar Krownest og SÓT spila á tónleikunum. CHÖGMA er framsækin þungarokkshljómsveit (e. progressive metal) frá austfjörðum sem blandar djent, djassi, gruggi og íslenskri þjóðlagatónlist við metalinn. CHÖGMA hefur vakið athygli fyrir ýkta sviðsframkomu og mikinn fjölbreytileika í hljóðfæraleik og söngstílum söngkonu hljómsveitarinnar. Hljómsveitin hefur, svo stiklað sé á stóru, hlotið þriðja sæti og trommuleikara ársins í Músíktilraunum, hitað upp fyrir hljómsveitina Sign, haldið tíu tónleika um allt land í samstarfi við European Solidarity Corps og gefið út singúlinn Veðurfréttir. Hljómsveitin vinnur nú í plötunni Hegðun sem kemur út á næstunni.