Anton og Magnús leiða lista Framsóknar og óháðra í Suðurnesjabæ

Tillaga uppstillingarnefndar Framsóknar og óháðra í Suðurnesjabæ var samþykkt með miklum meirihluta á fjölmennum félagsfundi í gærkvöldi. Anton Kristinn Guðmundsson skipar áfram efsta sæti listans.

Anton Kristinn Guðmundsson, stjórnsýslufræðingur og formaður Framsóknarfélags Suðurnesjabæjar, mun leiða listann inn í komandi kosningar. Í öðru sæti er Magnús Sigfús Magnússon, verkalýðsformaður og bæjarfulltrúi.

Áhersla á ábyrgan rekstur og lægri álögur

Í ræðu sinni á fundinum lagði Anton áherslu á að sveitarfélagið þyrfti að mæta framtíðinni með festu og skýra sýn að leiðarljósi.

„Ég tel mikilvægt að sveitarfélagið sé rekið af ábyrgð og festu. Við viljum leggja áherslu á sterka grunnþjónustu, öflug skólamál, bætt framboð húsnæðis og skilvirka stjórnsýslu,“ sagði Anton.

Hann bætti því við að flokkurinn hygðist leita leiða til að lækka álögur á ííbúa með því að auka hagkvæmni í rekstri, sem myndi skapa svigrúm til frekari uppbyggingar.

Kraftur í nýliðun og reynslu

Magnús Sigfús, sem skipar annað sætið, lýsti yfir mikilli ánægju með samsetningu listans. Hann segir blöndu nýliða og reynslubolta vera styrkleika hópsins.

„Listinn samanstendur af nýju og öflugu fólki ásamt fólki með reynslu, en allir eiga það sameiginlegt að vilja efla og bæta sveitarfélagið,“ sagði Magnús. Hann lagði áherslu á að samvinna yrði drifkrafturinn í mótun sameiginlegrar framtíðar íbúa.

---

Listi Framsóknar og óháðra í Suðurnesjabæ:

Sæti	Nafn	Starf/Heiti
1.	Anton Kristinn Guðmundsson	Stjórnsýslufræðingur og bæjarfulltrúi
2.	Magnús Sigfús Magnússon	Verkalýðsformaður og bæjarfulltrúi
3.	Ólöf Ólafsdóttir	Vaktstjóri í íþróttamiðstöð
4.	Sindri Lars Ómarsson	Grunnskólakennari
5.	Ewa Krysztopa	Sundlaugarvörður
6.	Gísli Jónatan Pálsson	Húsasmiður
7.	Óskar Helgason	Pípulagningamaður
8.	Þórsteina Þöll Árnadóttir	Íþróttarfræðingur
9.	Guðrún Sif Pétursdóttir	Deildarstjóri í leikskóla
10.	Gissur Þór Grétarsson	Fyrrv. vélstjóri og sjómaður
11.	Bjarki Dagsson	Tölvunarfræðingur
12.	Gunnlaug María Óskarsdóttir	Stuðningsfulltrúi
13.	Róbert Páll Arason	Húsasmiður
14.	Bylgja Dröfn Olsen Jónsdóttir	Bókari
15.	Hallur Jónas Gunnarsson	Formaður Hollvinasamtaka Reykjanesvita
16.	Guðrún Elva Friðriksdóttir	Matráður
17.	Haraldur Hinriksson	Fyrrv. bæjarverkstjóri
18.	Guðjón Ólafsson	Fyrrv. sjómaður og útgerðarmaður