Reykjanesbær verði leiðandi í barnavernd fyrir stærra umdæmi
Viðræður eru hafnar um mögulega samvinnu um stærra umdæmi barnaverndarþjónustu, þar sem Reykjanesbær yrði leiðandi sveitarfélag. Þetta kom fram á fundi velferðarráðs Reykjanesbæjar 12. febrúar.
Samkvæmt fundargerð óskaði Grindavíkurbær, ásamt framkvæmdanefnd vegna jarðhræringa í Grindavík, eftir viðræðum um samstarf á sviði barnaverndar. Markmiðið er að skoða hvort unnt sé að sameina krafta sveitarfélaganna í stærra þjónustusvæði, með Reykjanesbæ í forystuhlutverki.
Málið var lagt fram til kynningar á fundinum og liggja ekki fyrir frekari upplýsingar um fyrirkomulag, umfang eða tímasetningar að svo stöddu.
