Tvíburarnir skoruðu helming stiga Keflavíkur í Grindavíkursigri

Keflavík vann Grindavík í annað sinn í röð á tveimur vikum í Bónus deild kvenna í körfubolta í mjög skemmtilegum og spennandi leik í Blue höllinni í Keflavík í kvöld. Lokatölur 94-86.

Grindvíkingar voru miklu betri í fyrsta leikhluta og náðu 14 stig forskoti 15-29. Keflvíkingar vöknuðu við vondan draum og svöruðu í öðrum leikhluta. Þær pressuðu gestina stíft og léku hraðan bolta. Staðan í hálfleik 44-47 fyrir gestina.

Leikurinn var jafn áfram til leiksloka. Keflavík náði sjö stiga forskoti þegar tvær mínútur voru til leiksloka en Grindavík jafnaði þegar ein mínúta var eftir. Þristur frá Thelmu Dís Ágústsdóttur þegar 13 sekúndur voru eftir kom Keflavík í fimm stiga forskot og síðan stal Bríet Sif Hinriksdóttir boltanum í sókn Grindavíkur og geystist í sókn, náði ekki að skora í hraðaupplaupinu en fékk boltann aftur og smellti honum ofan í fyrir utan þriggja stiga línuna og gulltryggði sigur Keflavíkur.

Tvíburarnir voru bestar Keflvíkinga í leiknum. Bríet hefur komið sterk inn í síðustu tveimur leikjum, nú skoraði hún 19 stig en Sara Rún systir hennar var með 28. Saman skoruðu þær nákvæmlega helming stiga Keflavíkur í leiknum.

Grindavíkurkonur eiga erfitt með Keflavík en breidd bítlabæjarliðsins virðist koma sterkt inn í leikjum liðanna. Isabella Ósk Sigurðardóttir var mjög góð og skoraði 30 stig og tók 6 fráköst. Þá var Farhiya Abdi með 22 stig.