Nýjar áherslur hjá karlaliði Njarðvíkur

Rúnar Ingi Erlingsson, þjálfari karlaliðs Njarðvíkur, segir liðið fara inn í nýtt tímabil fullt sjálfstrausts og með skýr markmið. Hann viðurkennir að síðasta tímabil hafi endað í vonbrigðum, en nú sé liðið tilbúið í nýja vegferð.

Vonbrigði í fyrra en sterkari kjarni í ár

„Að detta út í átta liða úrslitum bæði í bikar og í úrslitakeppni á síðasta tímabili voru klár vonbrigði,“ segir Rúnar Ingi. „En á sama tíma var margt jákvætt – við spiluðum skemmtilegan körfubolta, gerðum Icemar-höllina að erfiðum útivelli og fengum stuðningsmenn með okkur.“

Hann segir að eftir tímabilið hafi hann farið yfir hvað mátti betur fara og stokkaði spilin upp. „Við héldum stórum kjarna leikmanna en vantaði aðeins meiri sveigjanleika. Við ákváðum því að bæta við nýju hlutverki til að gera okkur að liði sem getur raunverulega barist um titil,“ segir hann.

Nýir leikmenn og meiri dýpt

Njarðvík hefur fengið til liðsins bandaríska bakvörðinn Brandon Everett í stað Khalil Shabazz. „Brandon er ekki jafn mikill náttúrulegur skorari, heldur meiri sendingamaður. Mitt verkefni sem þjálfara er að hjálpa honum að finna jafnvægið milli þess að taka af skarið sjálfur og koma öðrum inn í leikinn,“ segir Rúnar Ingi.

Einnig bætist spænski leikmaðurinn Julio Assis sem lék með Grindvíkingum fyrir tveimur tímabilum, við hópinn. „Hann á að gefa okkur meiri sveigjanleika, sérstaklega varnarlega. Með honum fáum við fleiri lausnir þegar kemur að því að breyta leikstíl og vera með mismunandi vörn eftir leikjum,“ útskýrir þjálfarinn.

Hann segir einnig að mikilvægt sé að finna réttu hlutverkin fyrir lykilmenn eins og Dwayne Lautier og Dominikas Milka. „Við erum með marga leikmenn sem geta skorað en við þurfum að nýta það á réttan hátt. Liðsbolti og traust á liðsfélögunum verður lykilatriði,“ segir hann.

Stór markmið og sterkt undirbúningstímabil

Aðspurður um markmið tímabilsins svarar Rúnar ákveðið: „Við erum í þessu til að vinna. Hvort sem það er bikar eða Íslandsmeistaratitill, þá viljum við vera í baráttunni um alla titla. Annars væri ég ekki að eyða tímanum mínum í þetta.“

Njarðvík hefur leikið fimm æfingaleiki, þar af tvo í Króatíu. „Ferðin þangað var frábær, bæði körfuboltalega og sem teymisbygging. Við fengum tækifæri til að styrkja tengslin og vinna í því sem þarf að bæta,“ segir hann.

Fyrsti leikur tímabilsins er gegn Grindavík. „Það er ekki hægt að byrja á stærra prófi, mætum gömlum félaga og Julio mætir líka gömlum liðsfélögum í Grindavík. Grindavík er með sterkan hóp og þetta verður hörkuleikur. En við ætlum að mæta ákveðnir, byrja á sigri og senda skilaboð – bæði til okkar sjálfra og annarra – að við ætlum okkur að fara í hvern leik til að sigra,“ sagði Rúnar Ingi að lokum.