Hólmsvöllur kemur vel undan vetri – Ákvörðun um opnun tekin á mánudag

Kylfingar á Suðurnesjum geta farið að pússa græjurnar en nýleg yfirferð yfir Hólmsvöll gaf mjög jákvæðar vísbendingar. Völlurinn lítur vel út og engar sjáanlegar skemmdir fundust við ítarlega skoðun í gær.

Hagstæðar veðuraðstæður síðustu daga ásamt vinnu vallarstarfsmanna hafa skilað miklum árangri á stuttum tíma. Sérstaklega er tekið fram í tilkynningu frá klúbbnum að flatir vallarins hafi tekið vel við sér. Þó er ljóst að vorið er nokkuð síðar á ferðinni en í fyrra og völlurinn því nokkuð á eftir miðað við sama tíma þá.

Staðan tekin á mánudag

Endanleg ákvörðun um hvenær Hólmsvöllur verður opnaður fyrir almenna spilamennsku verður tekin á mánudaginn kemur. Þá munu vallarstjóri og stjórnendur klúbbsins fara yfir svæðið í hinsta sinn fyrir ákvörðunartöku.

Einnig er búist við upplýsingum um opnun æfingasvæðisins í byrjun næstu viku.

Skráning hefst um leið og dagsetning liggur fyrir

Golfklúbbur Suðurnesja segir stöðuna í dag gefa góð fyrirheit og að um leið og endanleg ákvörðun um opnunardag liggur fyrir, verði opnað fyrir skráningu á rástíma. Kylfingar eru því hvattir til að fylgjast vel með tilkynningum frá klúbbnum á næstu dögum.