Grindavík náði að jafna úrslitaseríuna gegn Val

Grindavík vann einn mikilvægasta sigur sinn í körfuknattleik í mjög langan tíma í kvöld en þeir mættu Valsmönnum í öðrum leiknum í úrslitarimmunni um Íslandsmeistaratitilinn. Eftir að hafa verið undir í leiknum í rúmar 38 mínútur af 40, náðu gulir að landa sigri, 93-89.

Daninn Daniel Mortensen kom Grindavík yfir með þristi þegar staðan var jöfn og tæpar tvær mínútur til leiksloka, þakið virtist hreinlega ætla rifna af Smáranum!

Það er á engan hallað ef Deandre Kane fær nafnbótina besti leikmaður leiksins. Kappinn endaði með 35 stig og tók 12 fráköst. Hann dró vagninn sóknarlega í lokin en svo var Mortensen líka mjög góður, endaði með 22 stig og tók 8 fráköst. Dedrick Basile var með 11 stig og 7 stoðsendingar og fyrirliðinn Ólafur Ólafsson var með 10 stig og 5 fráköst.

Gæðin í þessum körfuknattleik eru gríðarleg og var spennan og stemningin eftir því, alveg hreint frábær! Uppselt var í Smárann og má leiða talsverðum líkum að því að Origo-höll þeirra Valsmanna verði þétt setin á fimmtudagskvöld þegar þriðji leikurinn fer fram.