Óvissa um næsta gos hleypur á mánuðum

Kvikusöfnun undir Svartsengi hefur síðustu vikur verið hæg en stöðug, samkvæmt nýjustu mælingum og líkanreikningum Veðurstofu Íslands. Hraði innflæðis kviku hefur almennt dregist saman með hverju eldgosi á Sundhnúksgígaröðinni frá því í mars 2024, en hefur þó haldist svipaður síðustu tvær vikur.

Á meðan kvika safnast áfram aukast líkur á kvikuhlaupi og eldgosi, en óvissa um hvenær næsti atburður verður er töluverð. Miðað við núverandi hraða kvikusöfnunar er talið að óvissan með tímasetningar hlaupi á nokkrum mánuðum.

Fimmta mesta kvikumagnið frá upphafi atburðarins

Líkanreikningar sýna að frá því í mars 2024 virðist það kvikumagn sem þarf til að hrinda af stað nýju kvikuhlaupi eða eldgosi hafa aukist. Á bilinu 17–23 milljónir rúmmetra af kviku hafa safnast undir Svartsengi á milli eldgosa á þessu tímabili.

Frá síðasta eldgosi í júlí hafa nú rúmlega 17 milljónir rúmmetra af kviku bæst við kvikusöfnunarsvæðið undir Svartsengi. Það er svipað magn og mældist rétt fyrir eldgosið í maí 2024 og er það fimmta mesta kvikumagn sem safnast hefur milli gosa frá desember 2023.

Jarðskjálftavirkni er áfram lítil

Jarðskjálftavirkni á svæðinu er enn lítil. Síðustu tvær vikur hafa aðeins mælst tólf smáskjálftar og voru þeir staðsettir á svæðinu milli Stóra-Skógfells og Grindavíkur.

Engin merki eru um skarpa breytingu í skjálftavirkni sem gæti bent til þess að kvikuhlaup eða gos sé yfirvofandi á næstu dögum.

Hættumat óbreytt til 6. janúar

Hættumat Veðurstofu Íslands er óbreytt og gildir til 6. janúar 2026. Veðurstofan fylgist náið með þróun mála og tilkynnt verður ef breytingar verða á virkni sem kalla á endurskoðun matsins.

Veður gæti haft áhrif á mælitæki

Veðurspá fyrir svæðið næstu daga gerir ráð fyrir hvössum austan- og suðaustanáttum með rigningu og skúrum í dag, fimmtudag, og fram yfir helgi. Slík veðurskilyrði geta haft áhrif á næmni og gæði mælinga, meðal annars á skyggni, ljósleiðaramælingar, jarðskjálftamæla og rauntíma GPS-mælingar.

Veðurstofan mun áfram fylgjast náið með bæði veðri og jarðhræringum og hvetur fólk til að fylgjast reglulega með veðurviðvörunum og uppfærslum á vef stofunnar.