Ammar og Karrar hlutu viðurkenningu Rauða krossins fyrir hugrekki í bruna í Reykjanesbæ

Feðgarnir Ammar Jabbar og Karrar Radhi fengu viðurkenningu frá Rauða krossinum á Suðurnesjum á 112-deginum fyrir snör viðbrögð og hugrekki þegar þeir reyndu að bjarga nágranna sínum út úr brennandi íbúð í Reykjanesbæ í janúar.

Að sögn Rauða krossins var viðurkenningin veitt vegna þess að feðgarnir brugðust hratt við aðstæðum og reyndu að koma í veg fyrir enn alvarlegri afleiðingar.

Feðgarnir og fjölskylda þeirra segjast afar þakklát fyrir þann hlýhug sem samfélagið í Reykjanesbæ og bæjaryfirvöld hafi sýnt þeim í kjölfar brunans.

Við afhendinguna fengu feðgarnir einnig skyndihjálpartösku að gjöf auk skyndihjálparnámskeiðs frá Rauða krossinum.

Rauði krossinn minnir á að verði fólk vart við hættu eða neyð eigi að hringja strax í 112 og bregðast við eftir bestu getu, án þess að setja sig sjálft í hættu.