Eldsnöggur „Pokémon“ gerir dyrabjölluat í Tjarnahverfi

Það eru ennþá til börn sem eru úti að leika sér og eru uppátækjasöm. Þannig vekur íbúi í Tjarnahverfi í Innri Njarðvík athygli á uppátækjasömum „Pokémon“ sem er hlaupandi á milli húsa og dinglandi dyrabjöllum í hverfinu.

Eins og nútímafólki sæmir eru myndavéladyrabjöllur komnar á flest hús þannig að uppátækjasamir eru myndaðir í bak og fyrir við iðju sína.

„Maður gerir ekki þennan hrekk á þau hús sem eru með myndavélabjöllu,“ skrifar íbúi í hverfishópinn og notar tækifærið og hrósar barninu með þessum orðum:

„Þú ert samt mjög fljótur að hlaupa, mátt eiga það,“ og notar jákvæð „tjákn“ í lok færslunnar sem hefur fengið jákvæð viðbrögð með „Haha“-tákni fésbókarinnar.