Lýðheilsa, forvarnir barna, ungmenna og framtíð þeirra

Lýðheilsa er samfélagslegt verkefni þar sem hugað er að andlegri og líkamlegri heilsu þar sem forsenda okkar allra er að huga að börnunum strax í æsku. Þess vegna er mikilvægt að huga vel að forvörnum allt frá unga aldri og að börn séu börn til 18 ára aldurs.

Viðreisn ætlar að skapa börnum gott og skaðaminnkandi umhverfi.

*Við viljum símalausa skóla í Reykjanesbæ

*Við viljum hækka frístundastyrk

* Við viljum efla íþróttir og lækka félagsgjöld

*Við viljum fjölga sérfræðingum inni í skólakerfinu

*Við viljum fjölga leiktækjum og grænum svæðum

*Við viljum félagsmiðstöðvar í alla skóla

*Við viljum styrkja 88 húsið þannig að þau geti gripið viðkvæma hópa

Börn og ungmenni hafa sjálf kallað eftir símalausu umhverfi. Það er mikið áreiti á börnum og þau vilja frið frá samfélagsmiðlum. Þetta hefur komið fram á ungmennaþingi og ungmennaráði og þær raddir heyrast víða. Sími og önnur snjalltæki geta verið flótti hjá okkur öllum og draga úr mannlegum samskiptum, en með mannlegum samskiptum er líklegra að við finnum að við tilheyrum.

Hækkun frístundastyrks gerir það að verkum að fleiri geti stundað íþróttir og aðrar tómstundir sem er mikið lýðheilsu- og forvarnarmál sem má segja að séu líka ein af lykilatriðunum sem virkni inn í framtíð þeirra.

Það er mikilvægt að börnin og kennarar hafi aðgang að sálfræðingi eða sálgæsluaðila og það er líka mikilvægt að hafa aðgengi að öðrum fagmenntuðum einstaklingum eins og þroskaþjálfara, iðjuþjálfara (þverfaglegu teymi) og fleira góðu fólki sem þarf að koma til stuðnings við einstaka nemendur. Biðin má ekki verða of löng.

Mikið er af grænum svæðum þar sem við viljum setja niður leiktæki, bekki, körfuboltaspjöld eða fótboltamörk. Með bættu aðgengi að leiktækjum má ætla að við fáum börn og fullorðna út í leik og njótum samverunnar saman. Börn elska fátt meira en að fara út í leik og ná foreldrum og fullorðnum með, sem getur verið hluti af gæða samverustundum fjölskyldna. Fjölskyldur sem eiga góðar gæðastundir draga verulega úr þeim skaða sem annars getur orðið hjá börnum þeirra.

Með því að opna félagsmiðstöðvar inn í alla skóla er aðgengið betra að tómstundum fyrir utan skóla, þar sem faglegt teymi starfar og hvetur börn áfram í leik og verki. Þegar börn hafa ákveðinn samastað til að hittast á eru minni líkur á að ungmenni leiðist út í áhættuhegðun. Við viljum draga úr þeirri hættu að til verði einstaklings- og hópamyndun í áhættuhegðun. Við viljum að ungmenni 16–18 ára hafi aðgengi að 88 húsinu og að starfsmenn þar geti tekið utan um þau. Það þarf líka að taka utan um þennan hóp 16–18 ára sem er í virkri atvinnuleit. Mörg þeirra hafa verið í unglingavinnu en detta svo í gjá og fá ekki vinnu þegar tímabili unglingavinnunnar er lokið. Fáir verktakar taka þessi ungmenni í vinnu og krafan er víða að fólk hafi náð 20 ára aldri. Ég á því við að ákveðin gjá myndist og erfiðara er fyrir börn að komast aftur inn á atvinnumarkaðinn og meiri líkur eru á að við fáum vanvirk ungmenni sem annars væru það ekki.

Jóhanna Björk Sigurbjörnsdóttir

Skipar 8. sæti á lista Viðreisnar