Á Alþingi á ný, með Suðurnesin í forgrunni

Þegar maður stígur inn á þing í fyrsta sinn er það augnablik sem gleymist ekki. Ég tók sæti 18. mars sl. á Alþingi fyrir Höllu Hrund Logadóttur og þessar síðustu tvær vikur hafa verið eins og hraðnámskeið í þjóðmálum, þar sem prófið er tekið á hverjum degi.

Fyrsta lexían er sú að þingmenn eru mun meira í vinnunni en margir gera sér grein fyrir. Langir dagar, löng kvöld og alltaf eitthvað að ræða. Þetta er ekki starf sem hægt er að sinna með hálfum hug. Dagskráin er þétt og umræðurnar lifandi. Það er stöðugt verið að takast á við stór viðfangsefni sem snerta allt samfélagið.

Meðal þess sem bar hæst voru m.a. málefni varðandi Evrópusambandið, verðbólgu og vexti, málefni sem við finnum öll fyrir í daglegu lífi.

Þegar tækifærið kom

Meðal þess sem stóð upp úr var tækifærið til að taka þátt í óundirbúnum fyrirspurnum til ráðherra og ég beindi mikilvægri spurningu til forsætisráðherra. Það var mjög sérstök stund. Maður finnur fyrir ábyrgðinni, en líka kraftinum í því að tala um málefni sem snerta almenning.

Fyrsta spurningin sneri að efnahagsmálum sem eru á allra vörum, verðbólgu og nýlegri hækkun stýrivaxta. Ég spurði forsætisráðherra hvort ríkisstjórnin hygðist grípa til frekari aðgerða, þar sem það sem þegar hefur verið gert hefur greinilega ekki skilað nægilegum árangri. Ég spurði jafnframt hvort heimilin gætu búið við þessa óvissu til lengri tíma án frekari viðbragða. Heimilin á Suðurnesjum, eins og annars staðar, finna vel fyrir erfiðu ástandi.

Önnur spurningin sneri sérstaklega að mínu kjördæmi. Samkvæmt tölum OECD telja aðeins 18 prósent innflytjenda á Íslandi sig tala íslensku vel, á meðan meðaltal OECD-ríkja er 60 prósent. Þetta er mikill munur. Ég spurði hvort ekki væri tímabært að samþætta boðaða atvinnustefnu stjórnvalda, sem er í mótun, við aukið framboð á íslenskunámi og sterkari stuðning við innflytjendur, sérstaklega á Suðurnesjum. Forsætisráðherra tók vel í þessa spurningu og sagði þetta málefni afar mikilvægt. Svar hennar skipti mig miklu máli.

Suðurnesin eru tilbúin

Síðasta daginn minn á þingi lagði ég aðaláherslu á Suðurnesin; að fólkið á svæðinu sé ekki að bíða eftir tækifærum. Tækifærin eru þegar til staðar; alþjóðaflugvöllur, ferðaþjónusta, hafnir, orkuframleiðsla og öflug þekking sem hefur byggst upp í kringum jarðhita og frumkvæði fólksins sjálfs.

Innviðir til verðmætasköpunar í grænni orku, hátækni og hringrásarhagkerfi eru til staðar. Nú þarf að tryggja að stjórnvöld og menntakerfið fylgi því eftir. Framsókn vill atvinnustefnu og aðgerðir sem byggja á styrk Suðurnesja og tengja saman nýsköpun og íslenskunám þannig að allir geti tekið þátt.

Manneskjan á bak við hlutverkið

Það sem var ánægjulegt að upplifa er að þingmenn og ráðherrar eru fólk eins og ég og þú. Allir eru að leggja sig fram og vilja gera sitt besta fyrir samfélagið okkar. Mér var vel tekið og það gaf mér aukinn kraft. Takk fyrir það.

Við verðum ekki alltaf sammála um hvaða leið er best, en við getum verið sammála um eitt: að sýna virðingu fyrir þeirri vinnu sem unnin er í þágu samfélagsins.

Og það er ljóst í mínum huga: mig langar að halda áfram að vinna fyrir ykkur.

Fida Abu Libdeh,

varaþingmaður Framsóknarflokksins í Suðurkjördæmi og frumkvöðull