Fyrirtækjaheimsóknir á Suðurnesjum vinsælar
„Við ætlum ávallt að vera með góða þjónustu og gott vöruúrval,“ segir Vilhjálmur Ragnar Kristjánsson, verslunarstjóri Bílanausts sem opnaði nýlega að Hafnargötu 52 í Keflavík
Fyrirtækjaheimsóknir eru ný þjónusta í Bílanaust í Reykjanesbæ en verslunin opnaði á nýjum stað við Hafnargötu 52 nýlega. Vilhjálmur Ragnar Kristjánsson er verslunarstjóri og hann segir að aukinni þjónustu hafi verið vel tekið.
„Við heimsækjum fyrirtæki á Suðurnesjum alla daga. Tökum niður pantanir og erum í góðu sambandi við fyrirtækjaeigendur á Suðurnesjum. Þá hefur verslunin okkar á nýjum stað fengið afar góðar viðtökur en þar erum við með mjög mikið úrval af hvers kyns bílavörum og leggjum áherslu á að eiga sem flest sem tengist bílum. Ef við eigum ekki vöruna á staðnum þá getum við yfirleitt útvegað hana sama dag því við erum með tvær ferðir á dag á milli Reykjanesbæjar og Reykjavíkur, eina fyrir hádegi og aðra eftir hádegi. Varan getur því í mörgum tilfellum verið komin til okkar innan tveggja klukkustunda,“ segir Vilhjálmur.
Allt til fyrir bíleigendur
Motormax ehf keypti nýlega rekstur Bílanaust. „Stefnan er að vera með öfluga verslun á Suðurnesjum og enn betri þjónustu. Við erum þrír starfsmenn í versluninni og sinnum einnig fyrirtækjaheimsóknum. Við eigum nánast allt fyrir bíleigandann og bílaáhugamanninn og við höfum fundið það þessa fyrstu mánuði að það er mikill bílaáhugi á svæðinu. Það er svo sem ekki ný frétt að svo sé enda hef ég heyrt að Reykjanesbær hafi löngum verið þekktur fyrir að þar sé mikill bílaáhugi. Það sést jú á götunum Reykjanesbæjar og á Suðurnesjum,“ segir Vilhjálmur en hann býr í Grindavík.
Ný og aukin þjónusta
Auk nýrrar þjónustu í fyrirtækjaheimsóknum og tveggja ferð með pantaðar vörur daglega þá er einnig boðið upp á hópakynningar í versluninni.
Þegar Vilhjálmur er beðinn um að nefna eitthvað af vöruúrvalinu í Bílanausti liggur ekki á svarinu. Hér er upptalning á því helsta:
- Varahlutir í allar gerðir bíla
- Rekstrarvörur fyrir bíla
- Bílahreinsi vörur
- Toptul verkfæri
- Farangursbox, skíðafestingar og þess háttar.
- Kerrur og dráttarbeisli
- Ýmsar aðrar bílatengdar vörur.
Bílanaust er opið alla virka daga frá kl. 8 á morgnana til kl. 18 á kvöldin. Á laugardögum er opið kl. 10 til 14.
Í Bílanausti er að finna mikið úrval af margs konar hlutum og vörum fyrir bílinn.
Bílanaust flutti nýlega að Hafnargötu 54 í Keflavík.
