Stapi fagnar 60 ára afmæli

Þann 23. október kl. 17:00 verður haldin sérstök afmælishátíð í Stapanum í Hljómahöll til að minnast þess að 60 ár eru liðin frá því húsið var fyrst tekið í notkun.

Afmælishátíðin verður öllum opin og aðgangur er ókeypis meðan húsrúm leyfir. Boðið verður upp á léttar veitingar og skemmtilega dagskrá þar sem bæði verður litið til baka yfir sögu hússins og fagnað framtíðinni með tónlist og samveru.

Á sviðinu munu stíga:

• Synir Rúnna Júl

• Nina Simone Tribute

• Magnús & Jóhann

„Þetta verður hátíðleg stund þar sem við minnumst þessarar merku byggingar sem hefur verið hjarta menningarlífs á Suðurnesjum í áratugi,“ segir í tilkynningu frá Hljómahöll.

Afmælishátíðin er haldin í sjálfum Stapanum, sem hefur gegnt lykilhlutverki í menningar- og tónlistarlífi svæðisins allt frá upphafi. Þar hafa verið haldnir ótal tónleikar, viðburðir og samkomur sem hafa markað spor í sögu Suðurnesja.

Hátíðin hefst kl. 17:00 miðvikudaginn 23. október, og öllu almenningi er boðið að koma og fagna þessum tímamótum.