Ógleymanleg óvænt heimsókn frá hetjunum í Keflavík

Það var sannkölluð gleðistund sem átti sér stað í afmælisveislu sex ára drengs í Reykjanesbæ 31. maí síðastliðinn. Leonard Stirnir, sem varð sex ára þann 28. maí, átti aðeins eina ósk í tilefni dagsins – að sjá hetjurnar sínar úr meistaraflokki Keflavíkur.

Þeir Kári Sigfússon, Valur Þór Hákonarson, Gabríel Aron Sævarsson og Axel Ingi Jóhannesson tóku óeigingjarnt skref og brugðu sér í afmælið með stuttum fyrirvara, vopnaðir gjöfum, brosi og leikgleði. Þar spiluðu þeir fótbolta með Leonard og gerðu daginn að algjöru ævintýri sem hann mun aldrei gleyma.

„Ég hef aldrei séð barn með jafn miklar stjörnur í augunum,“ sagði móðir Leonards, Guðrún Ósk Þórudóttir, og bætti við að Leonard hafi fyrst verið örlítið feiminn – en glaðværðin tók fljótt yfir þegar hann áttaði sig á því hverjir voru mættir í afmælið.

Kakan var skreytt með ljósum sem báru nöfn Vals Þórs og Kára, enda var það eina afmæliskertisóskin hjá Leonard. Þrátt fyrir að ekki allir leikmennnir hafi komist, þá sendu þeir sem forfölluðust falleg skilaboð og hefðu svo sannarlega viljað vera með.

„Við erum svo þakklát fjölskylda í dag. Þetta var svo einlæg og hlý heimsókn, og það skein af leikmönnunum hvað þeim þótti vænt um að gleðja Leonard. Þetta er ekki sjálfgefið og við viljum að sem flestir viti hversu frábærir fulltrúar bæjarfélagsins þeir eru,“ segir Guðrún Ósk.

Það eru augnablik eins og þessi sem sýna hvað íþróttamenn geta haft jákvæð áhrif – ekki bara á velli, heldur líka í hjörtum ungra aðdáenda. Og það er ljóst að þessi heimsókn verður minning sem Leonard ber með sér um ókomna tíð.