Jólaljós, sköpun og sönn gleði í Skógarási
Desembermánuður í Heilsuleikskólanum Skógarási var fullur af hlýju, gleði og samstöðu. Jólaandinn var áberandi í öllu starfi og skapaði einstaka stemningu þar sem börnin nutu sín í skapandi og kærleiksríku umhverfi.
Vettvangsferðir um bæinn settu svip á mánuðinn og urðu að sannkölluðum ævintýrum. Börnin fengu að upplifa jólastemninguna í nærumhverfinu, rjóð í kinnum með heitt kakó í hönd, og styrktu þannig tengsl sín við bæinn og náttúruna. Heimsóknin í Aðventugarðinn var einn af hápunktum desember.
Elstu börnin höfðu unnið listaverk af mikilli alúð og skreyttu leikskólalundinn með stolti. Útkoman var falleg og jólarík og gaf börnunum tækifæri til að sjá eigin sköpun lifna við í samfélaginu.
Innan veggja skólans ríkti ró og sköpunargleði. Börnin nutu sögulesturs, listsköpunar og piparkökugerðar sem fyllti skólann af ilmi og hlátri. Þá heilluðust þau af „leikhúsi í tösku“ þegar Þórdís Arnljótsdóttir kom í heimsókn og kynnti þeim íslenskar jólahefðir á lifandi og skemmtilegan hátt.
Jólahefðir voru í hávegum hafðar og börnin bjuggu til sitt eigið jólatré á útisvæðinu. Þar var dansað og sungið af gleði, og þegar jólasveinninn mætti með mandarínur og sprell náði hátíðarstemningin hámarki. Foreldrafélag leikskólans færði skólanum höfðinglega gjöf í upphafi aðventu: sérstakt bókadagatal þar sem hver deild fékk nýja bók á mánudögum.
Bækurnar vöktu mikla gleði og styrktu áhuga barnanna á sögum og lestri. Desember í Skógarási var mánuður sem skilur eftir sig hlýjar minningar. Börn og kennarar nutu samveru, sköpunar og jólagleði í umhverfi þar sem vinátta og kærleikur fengu að blómstra.
Megi gleði og friður fylgja bæjarbúum inn í nýtt ár.
(Frétt og myndir frá Skógarási.)
