Húsið Sjólyst opið í sumar

Húsið Sjólyst er nýlega endursmíðað hús sem stendur við Gerðavörina í Garðinum. Á því svæði var mest um að vera í Garðinum um aldir. Sjólyst var byggð 1890 og Una, oft nefnd völva Suðurnesja, bjó þar um sína daga. Bókasafn Garðmanna var í húsinu og rúmaðist þar vel þó að húsið væri ekki stórt. Húsið má vel vera fulltrúi fjölmargra áþekkra húsa á Suðurnesjum á sínum tíma sem fá ef nokkur standa enn.

Húsið er opið á laugardögum og sunnudögum kl. 14–17. Heitt á könnunni og nýbakaðar vöfflur á borðum. Gestum er boðið að koma, skoða húsið og setjast í eldhús Unu og rabba. Stundum eru sagðar sögur og ljúfar minningar verma. Þannig kviknar stundum stemning sem var þar löngum.

Heimamenn eru gestgjafar hverju sinni. Oft var sest niður í ró hjá Unu og stundum kvikna samræður og notalegheit sem rifja upp það sem eitt sinn var.

Velkomin í Sjólyst í sumar.