Sjálfstæðisflokkurinn lang stærstur í skuggakosningum ungmenna
Sjálfstæðisflokkurinn fékk lang flest atkvæði í skuggakosningum Ungmennaráðs Reykjanesbæjar, Samfylking fékk næst flest og Framsókn í þriðja sæti.
Skuggakosningar fóru fram hjá nemendum í 8.-10. bekk í öllum sjö grunnskólum Reykjanesbæjar vikuna 11.-15. maí. Verkefnið var skipulagt og unnið af Ungmennaráði Reykjanesbæjar með það að markmiði að auka áhuga ungmenna á lýðræði, kosningum og samfélagsmálum.Alls tóku 645 ungmenni þátt í kosningunum. Nemendur fengu tækifæri til að kynna sér framboð, ræða málefni og upplifa hvernig kosningar fara fram í raunverulegu samfélagi.
Kosningarnar voru framkvæmdar með svipuðum hætti og hefðbundnar kosningar þar sem nemendur kusu á kjörstað innan sinna skóla.
Þetta kemur fram í tilkynningu frá Ungmennaráði Reykjanesbæjar sem vill þakka öllum skólunum, starfsfólki og nemendum kærlega fyrir samstarfið og þátttökuna í verkefninu.
