Gamla fréttin: Koma þurfi upp lágmarksaðstöðu við Bláa Lónið

Á aðalfundi Hitaveitu Suðurnesja í apríl 1985, fyrir nákvæmlega fjörutíu árum síðan, sagði Ingólfur Aðalsteinsson, forstjóri fyrirtækisins að Bláa Lónið, þá á sínum upphafsdögum, héldi uppi merki Hitaveitunnar um allan heim. Þetta kemur fram í frétt í Víkurfréttum frá aðalfundi HS þetta ár.

Ingólfur sagði á fundinum að lónið hefði mikið aðdráttarafl og væri vitað um erlenda hópa á leiðinni til Íslands til að kynnast lóninu. Enda væri svo komið, að lónið héldi uppi merki Hitaveitunnar um allan heim. En til að taka á móti gestum þyrfti að koma upp lágmarksaðstöðu fyrir fólk til að hafa fataskipti og slíkt kostaði 5 milljónir króna. Lagði hann til að Hitaveita Suðurnesja tæki að sér að kosta slíka aðstöðu.

Tómas Tómasson, þá forseti bæjarstjórnar Keflavíkur, Guðfinnur Sigurvinsson, bæjarfulltrúi í Keflavík og Eiríkur Alexandersson, þá framkvæmdastjóri Sambands sveitarfélaga á Suðurnesjum, sögðu allir að menn þyrftu að snúa bökum saman og þetta gæti verið fyrsta skrefið til að koma upp heilsustöð, möguleikarnir væru ótakmarkaðir. Lögðu þeir áherslu á að koma þyrfti upp góðri aðstöðu og koma þyrfti í veg fyrir hneisu og skaðabótakröfu ef aðstaða væri ekki fyrir hendi. Slíkt væri dýrara en að koma upp lágmarksaðstöðu.

Svo mörg voru þau orð í VF frétt fyrir fjörutíu árum. Nú er Bláa Lónið vinsælasti viðkomustaður erlendra ferðamanna og eitt verðmætasta fyrirtæki á Íslandi.