Bygg
Bygg

Íþróttir

Símon Logi genginn í raðir Njarðvíkinga
Jóhann Páll Kristbjörnsson
Jóhann Páll Kristbjörnsson skrifar
þriðjudaginn 23. júlí 2024 kl. 18:57

Símon Logi genginn í raðir Njarðvíkinga

Sóknarmaðurinn Símon Logi Thasapong hefur söðlað um og gengið til liðs við knattspyrnulið Njarðvíkur sem er í harðri toppbaráttu Lengjudeildar karla.

Á Facebook-síðu knattspyrnudeildar Njarðvíkur segir að knattspyrnudeildir UMFN og UMFG hafi gert með sér samkomulag um að sóknarmaðurinn Símon Logi Thasaphong leiki með Njarðvíkurliðinu út leiktíðina á láni frá Grindavík.

Bílakjarninn
Bílakjarninn

Þá skrifaði Símon Logi undir samning við Njarðvíkurliðið til ársins 2027 og verður því alfarið leikmaður Njarðvíkur að loknum lánstímanum.

Símon Logi í leik með Grindavík á síðustu leiktíð. VF/JPK

Símon er fæddur árið 2001 og hefur alla tíð leikið með uppeldisfélagi sínu, Grindavík, fyrir utan eina leiktíð með venslafélagi þeirra, GG.

Í heildina hefur Símon leikið 115 meistaraflokksleiki á vegum KSÍ og skorað í þeim 21 mörk, þar af sex á síðustu leiktíð í Lengjudeildinni.