Nítján meistaratitlar hjá ÍRB og landsliðssæti tryggð

Sundfólk ÍRB kom sá og sigraði á nýafstöðnu Íslandsmeistaramóti í 50 metra laug (ÍM50) sem fram fór helgina 27.–29. mars. Liðið, sem sendi 33 keppendur til leiks, sneri heim með hvorki meira né minna en sjö Íslandsmeistaratitla fullorðinna og tólf Unglingameistaratitla.

Árangur helgarinnar er staðfesting á þeim mikla styrk sem býr í félaginu, en auk fjölda verðlauna voru slegin 24 innanfélagsmet og fjölmargir sundmenn náðu lágmörkum fyrir komandi verkefni með landsliðum Íslands.

Guðmundur Leo á leið á EM

Einn hápunktur mótsins var frammistaða Guðmundar Leós Rafnssonar, sem varð fjórfaldur Íslandsmeistari. Hann vann allar baksundsgreinar mótsins (50m, 100m og 200m) auk þess að sigra í 100m skriðsundi. Með þessum glæsilega árangri tryggði hann sér þátttökurétt á Evrópumeistaramótinu (EM50) í 100m og 200m baksundi.

Aðrar stjörnur liðsins létu sömuleiðis til sín taka:

• Eva Margrét Falsdóttir varð tvöfaldur Íslandsmeistari í 200m og 400m fjórsundi.
  
  

• Adriana Agnes Derti sigraði í 200m flugsundi og varð þar með Íslandsmeistari.

Unglingarnir í sérflokki

Unglingastarfið hjá ÍRB heldur áfram að blómstra, en liðið landaði tólf titlum í þeim flokki. Meðal þeirra sem urðu Unglingameistarar eru:

• Margrét Anna Lapas: 50m, 100m og 200m bringusund.

• Mikael Fannar Arnarson: 50m og 200m baksund.

• Denas Kazulis: 50m og 100m skriðsund.

• Guðrún Ísold Harðardóttir: 800m og 1500m skriðsund.

• Daði Rafn Falsson: 200m fjórsund.

• Árni Þór Pálmason: 800m skriðsund.

• Adriana Agnes Derti: 200m flugsund.

• Gísli Kristján: 50m flugsundi.

Frábær árangur náðist einnig hjá Eydísi og Guðrúnu Ísold sem tryggðu sér sæti í Framtíðarhópi SSÍ sem heldur til Danmerkur í maí.

Íslandsmeistari hjá ÍF

Samhliða ÍM50 fór fram Íslandsmeistaramót Íþróttasambands fatlaðra (ÍF). Þar var Franciszek Adam Czachorowski fulltrúi ÍRB og stóð hann sig frábærlega. Hann varð Íslandsmeistari í 100m skriðsundi og vann auk þess til silfurverðlauna í 50m og 200m skriðsundi.

Sterk liðsheild og björt framtíð

Forráðamenn og þjálfarar ÍRB lögðu áherslu á að árangurinn væri afleiðing af mikilli vinnu, elju og sterkri liðsheild. Sérstakar þakkir voru færðar sjálfboðaliðum sem gerðu framkvæmd mótsins mögulega.

Ljóst er að mikill kraftur er í sundíþróttinni á Suðurnesjum og framtíðin sjaldan verið bjartari hjá félaginu.

---