Deiliskipulag Gauksstaða auglýst að nýju eftir úrskurð

Bæjarráð Suðurnesjabæjar hefur samþykkt samhljóða að auglýsa að nýju tillögu að deiliskipulagi við Gauksstaði. Þessi ákvörðun er tekin í kjölfar úrskurðar Úrskurðarnefndar umhverfis- og auðlindamála sem felldi fyrra samþykki bæjarráðs úr gildi. Niðurstaða nefndarinnar byggði á því að breytingar sem gerðar voru á skipulaginu eftir upphaflega auglýsingu hefðu verið það umfangsmiklar að auglýsa hefði átt tillöguna að nýju til að gefa almenningi kost á að tjá sig um umhverfisáhrif framkvæmdanna.

Skipulagið var auglýst í síðasta tölublaði Víkurfrétta eins og sjá má í þessum tengli.

Málið á sér nokkra sögu en Suðurnesjabær veitti landeiganda Gauksstaða heimild til deiliskipulagsgerðar árið 2022. Eftir að tillagan var fyrst auglýst seint á árinu 2024 var unnið úr fjölda athugasemda og gerðar tilteknar breytingar til að koma til móts við íbúa og lágmarka neikvæð áhrif. Meðal annars var umhverfismat aukið, sett inn ákvæði um takmörkun á þungaflutningum og staðsetning þjónustuhúss færð til. Það var einmitt þessi viðbót við umhverfismatið sem úrskurðarnefndin taldi vera grundvallarbreytingu sem kallaði á nýja opinbera kynningu.

Telja vinnubrögð bæjarins hafa verið fagleg

Í bókun bæjarráðs er lögð áhersla á að starfsmenn og kjörnir fulltrúar hafi vandað til verka á öllum stigum málsins. Fram kemur að leitast hafi verið við að leysa málið á farsælan hátt fyrir bæði framkvæmdaaðila og nágranna. Bæjarráð bendir einnig á að málið hafi farið í gegnum rýni hjá Skipulagsstofnun eftir að breytingarnar voru gerðar en fyrir endanlega staðfestingu. Í þeirri yfirferð hafi stofnunin ekki gert neinar athugasemdir við málsmeðferð bæjarins eða taldi þörf á endurtekinni auglýsingu á þeim tíma.

Úrskurðarnefndin taldi hins vegar að með hliðsjón af umfangi þeirrar ferðaþjónustu sem skipulagið heimilar væri það verulegur ágalli að eiginlegt umhverfismat hefði vantað í upphaflega kynningu. Þar sem úrbætur á matinu voru gerðar eftir á, taldi nefndin að almenningur hefði verið sviptur tækifæri til að koma á framfæri athugasemdum um þann mikilvæga þátt málsins.

Málið fer aftur í kynningu

Til að bregðast við úrskurðinum og tryggja að málsmeðferð sé í fullu samræmi við skipulagslög hefur bæjarráð nú falið skipulagsfulltrúa að auglýsa tillöguna að nýju. Með því gefst íbúum og öðrum hagsmunaaðilum kostur á að kynna sér deiliskipulagið í heild sinni, með uppfærðu umhverfismati og þeim breytingum sem gerðar hafa verið, og skila inn athugasemdum á nýjan leik. Þetta ferli er nauðsynlegt til að eyða lagalegri óvissu um verkefnið og tryggja rétt almennings til þátttöku í ákvörðunartöku um landnotkun á svæðinu.