Nýtt mælaborð grunnskólastarfs í mótun

Menntaráð Reykjanesbæjar hefur samþykkt tillögu um að hefja vinnu við að yfirfara og þróa árangursmælingar í grunnskólum sveitarfélagsins. Helgi Arnarson, sviðsstjóri menntasviðs, kynnti verkefnið á fundi ráðsins.

Markmiðið með mótun nýs mælaborðs er að koma á heildstæðri yfirsýn yfir lykilþætti skólastarfsins. Með því að nýta samræmd gögn og árangursmælikvarða með markvissari hætti er stefnt að því að styðja við sífelldar umbætur og efla skólastarf í öllum grunnskólum bæjarins.

Sérstakur starfshópur innan stjórnsýslunnar mun leiða verkefnið, en hann verður skipaður sviðsstjóra menntasviðs, grunnskólafulltrúa, deildarstjóra skólaþjónustu og yfirsálfræðingi skólaþjónustu.

Starfshópurinn mun vinna í nánu samráði við skólastjórnendur og aðra hagaðila eftir því sem vinnunni miðar áfram.