Krefjast afnáms á 12 daga reglunni

Bæjarstjórn Grindavíkur átti fund með forsætisráðherra

Bæjarstjórn Grindavíkur átti gagnlegan fund með Kristrúnu Frostadóttur, forsætisráðherra, og fylgdarliði hennar fimmtudaginn 25. júní. Á fundinum var farið yfir öryggismál í bænum, stöðu húsnæðismála og næstu skref varðandi endurreisn Grindavíkur.

Grindavík ekki hættulegri en önnur bæjarfélög

Sigurður Rúnar Karlsson og Einar Sveinn Jónsson, slökkviliðsstjóri, fóru ítarlega yfir öryggismál bæjarins á fundinum. Þar kom fram að allar hættur eru vel þekktar:

Sprungur hafa verið rammlega afgirtar.
Fyllt hefur verið upp í hættuleg jarðsig.
Slökkviliðið sinnir stöðugu eftirliti með girðingum og viðveru.

Skilaboð bæjaryfirvalda voru afgerandi: Þegar litið er til þessara miklu mótvægisaðgerða er Grindavík engan veginn hættulegri staður en önnur bæjarfélög.

Skýrar kröfur um gistisamninga og Þórkötlu

Markmið bæjarstjórnar á fundinum var skýrt. Auk þess að kynna sterka stöðu öryggismála voru dregnar fram tvær þungar kröfur:

Afnám á 12 daga reglunni: Þess var krafist að áform um takmarkanir á gistináttasamningum yrðu dregin til baka og að þeir yrðu áfram óbreyttir.
Fyrirsjáanleiki fyrir íbúa: Lögð var áhersla á að endurkaupaáætlun Þórkötlu verði kynnt samfélaginu sem allra fyrst.

Nýtt áhættumat grundvöllur frekari ákvarðana

Eins og við var að búast gat forsætisráðherra engu lofað um beinar aðgerðir eða afnám á takmörkunum á gistináttasamningum strax á fundinum.

Ljósi punkturinn fólst hins vegar í mikilli áherslu ráðherra á nýtt og uppfært áhættumat. Það mat er nú unnið í nánu samstarfi við Grindvíkinga og mun líta dagsins ljós fljótlega í sumar. Forsætisráðherra gerði grein fyrir því að þegar það mat liggur fyrir, skapist sá faglegi grunnur sem þarf til að skoða megi endurkaupaáætlunina af alvöru og fara yfir gistisamningana að nýju.

„Bæjarstjórn fagnar því samráði sem nú á sér stað við gerð áhættumatsins og metur fundinn skref í rétta átt. Baráttunni fyrir raunhæfum lausnum, minni óvissu og skýrum valkostum fyrir Grindvíkinga verður þó haldið áfram af fullum þunga á næstu vikum.“