Fréttir

Heilsuleikskólinn Krókur fékk brons hjólavottun
Föstudagur 18. september 2020 kl. 10:49

Heilsuleikskólinn Krókur fékk brons hjólavottun

Heilsuleikskólinn Krókur í Grindavík fékk brons hjólavottun sem hjólavænn vinnustaður/leikskóli þegar Sesselja Traustadóttir frá Hjólafærni tók út aðstöðu skólans, hélt fyrirlestur um verkefnið og færði skólastjóra viðurkenningarskjal þess efnis á skipulagsdegi.

Markmið verkefnisins er að vinna að bættum ferðavenjum með því að hvetja starfsmenn og foreldra til að ganga eða hjóla í og úr skólanum ásamt því að bæta aðbúnað og þjónustu við hjólreiðafólk.

Brons vottunin er fyrsta skrefið að því að fjölga þeim sem velja umhverfisvænan og heilsueflandi ferðamáta og segir í frétt á heimasíðu Króks að leikskólinn stefni að sjálfsögðu á Gullið.

Þar segir einnig að verkefnið samræmist vel heilsu- og umhverfisstefnu skólans. Íþróttamiðstöðin hefur nú þegar fengið brons hjólavottun og tjaldstæðið fengið vottun sem hjólavænt tjaldstæði og segjast stjórnendur Króks vera stoltir því að vera í þessum hópi, segir á heimasíðu skólans.