Fella byggingarréttargjöld alveg niður í Reykjanesbæ

Meirihluti skipulagsráðs Reykjanesbæjar hefur samþykkt tillögu Sjálfstæðisflokks og Miðflokks um að fella byggingarréttargjöld á landi sveitarfélagsins alveg niður, úr 35.000 krónum á fermetra í 0 krónur. Lækkunin nær einnig til atvinnuhúsnæðis. Tillagan fer nú til staðfestingar í bæjarstjórn.

Með ákvörðuninni fellur niður 5.250.000 króna kostnaður við byggingu á 150 fermetra íbúðarhúsnæði. Gjöld á iðnaðar-, verslunar- og þjónustulóðum lækka samtímis úr 6.000 krónum í 0 krónur á fermetra. Fulltrúar Samfylkingar og Framsóknar í ráðinu kusu gegn tillögunni.

Meirihlutinn segir í fréttatilkynningu að um sé að ræða „eina umfangsmestu skattalækkun vegna uppbyggingar á sveitarstjórnarstiginu síðustu ár“ og að samhliða verði unnið að niðurfellingu á samþykkt um innviðagjald.

Helstu breytingar:

Íbúðarhúsnæði: Byggingarréttargjald lækkar úr 35.000 kr./m² í 0 kr./m².
Atvinnuhúsnæði: Gjöld á iðnaðar-, verslunar- og athafnasvæðum lækka úr 6.000 kr./m² í 0 kr./m².
Umfang: Breytingin tók gildi á landi í eigu Reykjanesbæjar, en í bókun meirihlutans kemur fram að hann „væntir þess að aðrir landeigendur í Reykjanesbæ fylgi fordæmi sveitarfélagsins“.
Fjárhagsleg áhrif: Ákvörðunin hefur ekki áhrif á rekstraráætlun ársins þar sem „ekki er gert ráð fyrir tekjum af byggingarréttargjöldum á yfirstandandi ári“.

Markmið og rökstuðningur meirihlutans

Í tilkynningunni kemur fram að markmið breytingarinnar sé „að lækka álögur, ryðja úr vegi hindrunum og gera Reykjanesbæ að eftirsóknarverðasta sveitarfélagi landsins til uppbyggingar.“

Í bókun meirihlutans er lögð áhersla á að opinber gjaldtaka hafi hækkað byggingarkostnað og þrýst upp fasteignaverði:

„Þannig hefur myndast vítahringur sem bitnar fyrst og fremst á heimilum landsins. Reykjanesbær ætlar að gera það sem í hans valdi stendur til að rjúfa þennan vítahring og sýna gott fordæmi með því að lækka álögur verulega á uppbyggingu í stað þess að hækka þær.“

Þá segir meirihlutinn að ákvörðunin endurspegli „skýra séreignarstefnu“ og að hún eigi að tryggja sanngjarnara umhverfi fyrir minni verktaka og fjölskyldur:

„Við viljum ekki samfélag þar sem aðeins stærstu verktakarnir hafa bolmagn til að taka þátt í nýrri uppbyggingu. Við viljum að minni verktakar geti byggt, að iðnaðarmenn geti ráðist í eigin verkefni, að fjölskyldur geti byggt sér hús og að fleiri geti tekið þátt í verðmætasköpun innan sveitarfélagsins.“

Varðandi röksemdir um að gjaldið sé nauðsynlegt til að fjármagna innviði segir í bókuninni að meirihlutinn telji „ekki sanngjarnt að kostnaður við almenna innviði sveitarfélagsins sé færður sérstaklega yfir á þá sem eru að byggja ný heimili eða atvinnuhúsnæði“, heldur eigi sveitarfélög frekar að skapa skilyrði fyrir uppbyggingu og nýta fyrirliggjandi tekjustofna á borð við útsvar, fasteignaskatta og gatnagerðargjöld.