Dreginn vélarvana til Sandgerðis

Benni Sæm GK kom með vélarvana Hópsnes GK til Sandgerðis nú undir kvöld eftir að Hópsnesið hafði orðið vélarvana vestur af Stafnesi. Engin hætta var á ferðum og gott í sjóinn.

Taug var komið á milli bátanna og stefnan tekin á Sandgerði þangað sem bátarnir komu undir kvöld. Innan hafnar tók svo Geirfugl GK við spottanum og dró Hópsnesið að löndunarkrönum á norðurgarðinum en Benni Sæm GK fór á suðurgarðinn til löndunar.

Á sama tíma og Benni Sæm GK var að koma inn til hafnar með Hópsnes fór björgunarskipið Hannes Þ. Hafstein og björgunarbáturinn Njörður úr höfn í Sandgerði og stefndu að Hafnabergi. Þar var bátur í vanda, eins og greint er frá í annarri frétt hér á vf.is.