Reykjanesbær skoðar málið eftir að geymslur á Ásbrú voru tæmdar

Tveir íbúar í Reykjanesbæ segja að starfsmenn bæjarins hafi farið inn í geymslur þeirra á Ásbrú, fjarlægt búslóðir og látið farga munum eða láta þá áfram. Í umfjöllun RÚV kemur fram að annar aðilinn krefjist bóta vegna búslóðar sem átti að vera í geymslunni, en bærinn hafi vísað á leigusala.

Kristín Dögg Josézinho Guðmundsdóttir segir að stjúpdóttir hennar hafi verið með geymslu á leigu á Ásbrú og þar hafi hún geymt stærstan hluta eigna sinna, meðal annars heimilistæki og húsgögn, á meðan hún leitaði að húsnæði. Þegar vitja átti geymslunnar í desember hafi hún komið að opinni hurð og geymslan verið tóm. Kristín segir þau í fyrstu hafa talið að brotist hefði verið inn, en eftir að málið var kannað hafi komið í ljós að það var sveitarfélagið sem tæmdi geymsluna.

Samkvæmt frásögn Kristínar viðurkenndi starfsmaður bæjarins í samtali að geymslur hefðu verið opnaðar og tæmdar, þar sem talið var, fyrir mistök, að bærinn væri með umsjón eða umráð yfir öllum geymslunum á svæðinu. Kristín segir einnig að hluti muna hafi átt að hafa farið áfram til Fjölsmiðjunnar á Suðurnesjum, en öðru verið hent.

Hún segir Reykjanesbæ hafa neitað að bæta tjónið og bent á leigusala. Málið hafi verið tilkynnt til lögreglu og síðar kært. Þá kemur fram í umfjöllun RÚV að annar íbúi hafi einnig orðið fyrir því að geymsla hans var tæmd og hann hafi leitað lögfræðiaðstoðar.

Í framhaldi af málinu hefur bæjarstjóri Reykjanesbæjar, Kjartan Már Kjartansson, sagt að skoðað verði nánar hvers vegna starfsmenn bæjarins tæmdu geymslurnar og að þörf sé á að fá skýrari mynd af atvikum áður en frekari upplýsingar eru gefnar.