Allt til fyrirmyndar í stóreftirliti lögreglunnar á Keflavíkurflugvelli

Lögreglan á Suðurnesjum fór í umfangsmikið eftirlit á flughlaði Keflavíkurflugvallar í gærmorgun þar sem sjónum var beint að öryggi á vinnusvæðinu. Í eftirlitinu voru ökumenn á fjórða tug vinnuvéla stöðvaðir og var farið ítarlega yfir vinnuvélaréttindi, almenn ökuréttindi og ástand ökumanna við stýrið.

Skemmst er frá því að segja að allir voru með sitt á hreinu og engar athugasemdir voru gerðar, sem lögreglan segir hreint út sagt frábært. Lögreglan hrósar starfsfólki á flughlaðinu fyrir fyrirmyndar vinnubrögð og minnir á að öryggi á vinnustöðum byrji alltaf hjá okkur sjálfum.