Thrifty Fólksbílar

Aðsent

Flutningskerfi raforku og öryggi á eldsumbrotatímum
Föstudagur 26. mars 2021 kl. 06:10

Flutningskerfi raforku og öryggi á eldsumbrotatímum

Gosið í Geldingadal er merkilegur atburður. Hér erum að ræða fyrsta gosið á Reykjanesskaga í 800 ár. Jarðvísindamenn hafa sagt að þetta geti verið upphafið af tímabili þar sem komi fleiri gos. Óvissa sé um það hvenær næsta gos komi. Eldsumbrotum á Reykjanesi eigi eftir að fjölga til muna. Runnið sé upp nýtt kvikuskeið á Reykjanesinu.

Þessi atburður beinir sjónum að flutningskerfi raforku til Suðurnesja og öryggi þess. Ekki er deilt um nauðsyn þess að styrkja flutningskerfi raforku til Suðurnesja. Hins vegar hefur verið deilt um með hvaða hætti flytja eigi orkuna. Hvort leggja eigi nýja loftlínu eða jarðstreng. Deilur þessar hafa staðið um árabil og verður að segjast eins og er að ríkisvaldið og Landsnet hafa haldið illa á málinu. Voru stjórnvöld meðal annars gerð afturreka með eignarnámsheimild. Málið er enn í hnút.

Er núverandi línustæði heppilegt í ljósi jarðhræringa?

Við undirbúning nýrra flutningsvirkja raforku er að mörgu að hyggja. Þar vegur öryggisþátturinn þungt. Eldsumbrotin hér á Reykjanesi vekja upp spurningar um hvort að flutningskerfið til Suðurnesja geti verið í hættu og hvort að núverandi línustæði sé yfir höfuð heppilegt með tilliti til jarðhræringa. Hugmyndir um sæstreng milli Straumsvíkur og Suðurnesja eru ekki nýjar af nálinni. Fullt tilefni er hins vegar til að skoða þennan möguleika nú að fullri alvöru. Ekki síst í ljósi þess að vísindamenn telja að Reykjanesskaginn sé á leið inn í nýtt tímabil jarðhræringa sem gæti staðið yfir um áratuga skeið. Stjórnvöld eiga að fara þess á leit við Landsnet að nú þegar verði hafin vinna við áætlun um lagningu sæstrengs til Suðurnesja.

Birgir Þórarinsson.
Höfundur er þingmaður ­Miðflokksins í Suðurkjördæmi.
[email protected]