„Við sáum tækifæri þar sem aðrir sáu tóm hús“
Viðskiptafélagarnir Kristján Pétur Kristjánsson og Heiðar Heiðarsson kynntust fyrir tilviljun árið 2015. Nú reka þeir hótel og bílaleigu á Ásbrú, leigja út skrifstofur og eru að breyta fyrrverandi hóteli í 64 íbúðir. Í kringum reksturinn eru um 17 þúsund fermetrar af húsnæði — og þeir segjast hvergi nærri hættir.
Morgunverðurinn á Konvin hótelinu hefst klukkan fjögur. Þá eru fyrstu gestirnir þegar farnir að hugsa um flugið, bílinn eða næsta áfangastað. Þegar líður á morguninn hafa margir þeirra yfirgefið hótelið og nýr hópur er væntanlegur síðdegis.
„Þetta er bara endurnýjun á hótelinu á hverjum einasta degi,“ segir Kristján Pétur. Félagi hans, Heiðar, bætir við að snemmbúinn morgunverður sé orðinn mikilvægur hluti þjónustunnar. Fyrir gesti sem eiga morgunflug getur skipt sköpum að fá að borða áður en lagt er af stað.
Það er erfitt að sjá þessa iðandi starfsemi fyrir sér þegar þeir lýsa fyrstu kynnum sínum af húsinu. Það hafði staðið autt árum saman eftir brottför varnarliðsins. Lagnir voru úr sér gengnar, vatn hafði komist inn og veggirnir báru þess merki að enginn hefði haft áhyggjur af því hvernig þar væri umhorfs.
Þeir félagar sáu hins vegar að herbergin og gangarnir gætu hentað fyrir hótel. „Við sáum tækifæri í að stækka reksturinn og flytja hann hingað.“
Tilviljun sem vatt upp á sig
Kristján Pétur starfaði í bankageiranum og Heiðar í fasteignageiranum þegar leiðir þeirra lágu saman árið 2015. Þeir þekktust ekki áður en fundu fljótt sameiginlegan áhuga á fasteignum og framkvæmdum. Fyrstu verkefnin voru meðal annars íbúðarbyggingar í Mosfellsbæ og hótelverkefni á höfuðborgarsvæðinu.
Tækifærið á Ásbrú kom þegar þeim bauðst að kaupa rekstur gistiheimilis við Valhallarbraut. Um svipað leyti keyptu þeir húsið sem nú hýsir Konvin hótelið. Þeir ráku um tíma gistingu í báðum húsunum, en færðu síðan meginreksturinn yfir í það stærra.
„Þetta var svolítið djarft á sínum tíma,“ segir Heiðar um ákvörðunina að fjárfesta á svæðinu. Kristján Pétur segir starfandi gistirekstur hafa verið lykilatriði: „Við sáum að þetta virkaði og að það væri hægt að byggja ofan á það.“
Endurbæturnar urðu umfangsmiklar. Að sögn þeirra hafa lagnakerfi og rafmagn verið endurnýjuð, húsið tekið breytingum að utan og ný sameiginleg rými orðið til. Hótelið er nú með 134 herbergi, mörg þeirra rúmgóð þriggja og fjögurra manna herbergi. Þeir áforma að fjölga herbergjunum lítillega.
Ný viðbygging á að bæta aðkomuna og færa veitingastað, bar og morgunverðaraðstöðu niður á jarðhæð. Núverandi morgunverðarsalur tekur um 60 til 70 manns í sæti, að þeirra sögn, en nýi salurinn verður mun stærri. Það kemur sér vel þegar hundruð gesta þurfa að komast í gegnum morgunverðinn á skömmum tíma.
„Þetta er líka andlitið á húsinu,“ segir Heiðar um breytingarnar. Þeir viðurkenna þó fúslega að útlitið hafi kostað sitt. „Þetta eru dýrustu fermetrarnir sem við höfum farið í,“ segir hann og hlær.
Frá keilusal að bílaleigu
Hótelið er aðeins hluti af starfseminni. Í fyrrverandi keilusal varnarliðsins er nú aðstaða bílaleigunnar Konvin Car Rental. Þar eru meðal annars hefðbundnir bílaleigubílar, húsbílar og bílar með þaktjöldum.
Tengingin við hótelið lá beint við, segja þeir. Margir gestir þurfa bíl þegar þeir koma til landsins og geta nú nálgast hann á sama svæði og þeir gista. Þaktjöldin má taka af bílunum yfir veturinn og nýta þá áfram sem venjulega bílaleigubíla.
Í nærliggjandi húsi hafa þeir jafnframt komið upp Konvin-setrinu, með lokuðum skrifstofum, sameiginlegri kaffiaðstöðu og fundarherbergjum. Þar eru ellefu skrifstofur auk aðstöðu fyrir háskólastarfsemi. Kristján Pétur segir að þar hafi myndast samfélag þótt hvert fyrirtæki hafi sitt eigið rými: „Á föstudögum hittast allir og skiptast á að halda kaffiboð.“
Þeir segja ákvarðanir sínar um nærliggjandi hús líka hafa snúist um götuna sjálfa. Þegar hótelið tók að breytast vildu þeir sjá umhverfið þróast með því. „Þetta skiptir máli fyrir heildarmyndina,“ segir Heiðar. „Við vildum að það væri fallegt að koma hingað.“
Næsta stóra verkefni er annars eðlis. Fyrrverandi hótelhúsi við Valhallarbraut er nú breytt í 64 íbúðir, aðallega stúdíóíbúðir og tveggja herbergja íbúðir. Þeir hyggjast eiga þær áfram og leigja út. Hluti þeirra gæti einnig nýst starfsfólki, enda sé húsnæði mikilvægt þegar mannaflafrekur rekstur stækkar.
Fólkið á bak við reksturinn
Kristján Pétur áætlar að á bilinu 70 til 80 þúsund manns gisti á hótelinu á ári. Margir dvelja aðeins eina nótt. Gestir sem eiga snemmt flug geta fengið morgunverð frá klukkan fjögur, farið með morgunrútu á flugvöllinn og, ef þeir koma á eigin bíl, skilið hann eftir við hótelið meðan þeir eru erlendis.
Að sögn félaganna starfa um 80 til 100 manns við fyrirtækin eftir árstíðum. Sumt starfsfólkið var þegar á staðnum þegar þeir tóku við rekstrinum og hefur verið þar áfram. Aðrir hafa færst í aukna ábyrgð í gegnum árin.
„Okkur hefur tekist vel að halda í gott fólk,“ segir Kristján Pétur. Heiðar tekur undir: „Fólk hefur fengið að vinna sig upp hjá okkur.“
Á bak við breytingarnar á húsunum er líka fastur hópur iðnaðarmanna. Þeir segja eigin smiði hafa unnið að endurbótum á svæðinu árum saman, auk fjölda verktaka og þjónustuaðila sem þeir kaupa vinnu af.
„Ásbrú á svo mikið inni“
Þegar þeir komu fyrst á Ásbrú upplifðu þeir svæðið sem hálftómt. Nú benda þeir á íbúa, skóla, íþróttastarf, gistingu og fyrirtæki sem fylla hverfið lífi. Þeir telja að starfsemin þar sé meiri en margir átta sig á við fyrstu sýn.
„Ásbrú er hverfi í Reykjanesbæ, alveg eins og Keflavík, Njarðvík og Hafnir,“ segir Kristján Pétur. Honum finnst umræðan stundum taka of lítið mið af því hversu margir búi, vinni og dvelji þar á hverjum degi.
Þeir sjá enn rými fyrir meiri þjónustu á svæðinu og eiga sjálfir húsnæði sem bíður næsta verkefnis. Þeir vilja velja starfsemi sem hæfir staðnum og þeirri ásýnd sem þeir hafa verið að byggja upp.
Samstarf þeirra félaga sem hófst með tilviljunarkenndu spjalli er því orðið að samfelldu verkefni við að endurnýja hús, skapa rekstur og móta hluta af Ásbrú. Þegar þeir eru spurðir hvort nú fari að hægjast um svarar Kristján Pétur án þess að hika:
„Við erum hvergi nærri hættir.“
