Sjósókn bæði lítil og erfið

Það er komið fram í miðjan mars og jú, þetta hefði samkvæmt öllu átt að vera stærsti aflamánuður ársins en eins og ég kom inn á í síðasta pistli þá hefur veðurfarið heldur betur gert það að verkum að sjósókn er búin að vera vægast sagt mjög lítil og erfið.

Frá því síðasti pistill kom þá gaf eitthvað á sjóinn, en ekkert af neinu viti, og línuveiðin hefur datt nokkuð niður miðað við mokið sem var í febrúar.

Fjölnir GK komst í þrjá róðra og var með 27 tonn sem landað var í Grindavík. Guðbjörg GK hefur aðeins komist í tvo róðra og landað 14 tonnum, líka í Grindavík. Óli á Stað GK hefur náð í 23 tonn í síðustu þremur róðrum og var tveimur löndunum af þessum landað í Grindavík en reyndar var 19 tonnum af þessum afla landað utan við Sandgerði en í seinni ferðinni hjá bátnum þá var hann að veiðum utan við Sandgerði en sigldi með aflann til Grindavíkur og landaði þar um 11 tonnum.

Geirfugl GK kom með 5,6 tonn í einni löndun, Tryggvi Eðvarðs SH kom til Sandgerðis með 8 tonn. Indriði Kristins BA kom til Sandgerðis með tæp 11 tonn, og fór síðan til Grindavíkur þar sem var að veiðum og kom þar með rúm 7 tonn.

Eftir stendur þá Margrét GK sem hefur gengið hvað best þessa fáu daga sem var hægt að róa því að báturinn landaði 34 tonnum í aðeins þremur róðrum og mest um 16 tonnum í einni löndun.

Aftur á móti þá er búið að vera mokveiði hjá netabátnum Erling KE en hann er búinn að landa núna í mars 203 tonnum í 11 róðrum. Þess má geta að áhöfnin á Erling KE hefur ekki látið þetta skítaveður stoppa sig en þeir hafa náð að fara í sex róðra í röð og mokveitt í þeim öllum og landað í þessum sex róðrum alls 168 tonnum en það gerir 28 tonn í róðri að meðaltali, sem er feikilega gott.

Tveir dragnótabátar hafa farið oftast út bátanna en báðir hafa farið í sjö róðra og eru þetta Aðalbjörg RE og Sigurfari GK. Báðir eru líka komnir með yfir 100 tonna afla. Aðalbjörg RE er komin með 112 tonn í 7 og mest 22 tonn og Sigurfari GK kominn með 128 tonn og mest 31 tonn.

Benni Sæm GK og Siggi Bjarna GK hafa báðir farið í fjóra róðra hvor, bátur. Benni Sæm GK með 60 tonn og mest 23 tonn og Siggi Bjarna GK með 75 tonn og mest 25 tonn.

Á Suðurnesjunum eru gerðir út þrír frystitogarar og ætla aðeins að líta á þá fyrir árið 2025. Árið 2025 var mjög gott hjá frystitogurum því að aflaverðmæti var um 23% hærra árið 2025 en árið 2024. Samtals veiddu þessir þrír frystitogarar frá Suðurnesjunum alls 27 þúsund tonn og var samtals aflaverðmæti þeirra 15,9 milljarðar króna ( miðast við FOB og EXW sem er svipað og FOB).

Skipin voru eftirfarandi:

• Tómas Þorvaldsson GK var með 8732 tonna afla í 11 löndunum og mest 937 tonna löndun og aflaverðmæti 5,2 milljarðar króna ( EXW) sem gerir um 595 krónur í meðalverð.
  
  
• Hrafn Sveinbjarnarsson GK var með 8251 tonna afla í 15 ferðum og mest 725 tonn í einni löndun og aflaverðmæti 4,8 milljarðar króna ( FOB) sem gerir 582 krónur í meðalverð.
  
  
• Baldvin Njálsson GK var með 10.521 tonna afla í 12 ferðum og mest 1.052 tonn í einni löndun, aflaverðmæti 5,84 milljarðar króna ( FOB) og það gerir 555 krónur í meðalverð.

Þess má geta að Baldvin Njálsson GK var með næstmest aflaverðmæti allra frystitogara árið 2025 og þriðji aflahæsti frystitogarinn á landinu.

Skýringin á því af hverju meðalverð hjá Tómasi og Hrafni er hærra en hjá Baldvini er sú að þeir voru meira að veiða þorsk en aftur á móti var Baldvin með töluvert mikið af karfa og ufsa í sínum afla sem er lægra verð fyrir.

Engu að síður mjög gott ár sem árið 2025 var hjá þessum þremur skipum.