Rafn Sig fékk menningarverðlaun Voga

Menningarverðlaun Sveitarfélagsins Voga í ár hlaut Rafn Sigurbjörnsson eða Rafn Sig eins og hann er oftast kallaður - ljósmyndari, myndbandsgerðar- og tónlistarmaður.

Verðlaunin voru afhent á þjóðhátíðardaginn 17. júní í Tjarnarsal. Rafn býr hér í Vogum og hefur í áratugi tileinkað sér það að fanga undur íslenskrar náttúru með ljósmyndum og myndböndum, með yfir fjörutíu ára reynslu sem sjálfmenntaður ljósmyndari.

Á heimasíðu Voga segir:
„Rafn hefur ferðast vítt og breitt um Ísland og gefið út bækur og efni sem sýna fjölbreytileika og fegurð landsins okkar. Verk hans hafa birst í tímaritum og bókum víða.

En í öllum sínum myndverkum hefur hann ekki gleymt heimabyggðinni. Hann hefur sérstaklega lagt sig fram við að mynda Voga og nágrenni – og með verkum sínum hefur hann ekki aðeins sýnt öðrum hversu fallegt þetta svæði er, heldur líka fangað sögulegar og náttúrulegar breytingar sem eiga sér stað hér með tímanum. Þannig hefur hann ekki bara myndað – heldur skráð og varðveitt.

Rafn á því sannarlega lof skilið fyrir hvernig hann hefur kynnt Sveitarfélagið Voga – og um leið skapað verðmæta heimild um líf, landslag og náttúru þess.

Með vefsíðunni Iceland Photo Gallery, YouTube-rásinni Iceland Video Gallery, ljósmyndabókum sínum og innleggi sínu á samfélagsmiðlum hefur Rafn gefið fjölda fólks tækifæri til að njóta íslenskrar náttúru og landslags.“