Fjör á Þorrablóti Keflavíkur - myndir
Keflvíkingar þjófstörtuðu að venju þorra með veglegu þorrablóti í Blue-höllinni 17. janúar. Um átta hundruð manns mættu prúðbúin til leiks og nutu þorramatar og skemmtidagskrár.
Páll Orri Pálsson veislustjóri opnaði kvöldið með því að minnast Magnúsar Haraldssonar sem lést fyrr þennan dag. Magnús var mikill Keflvíkingur og var m.a. í fyrsta Íslandsmeistaraliði Keflavíkur 1964.
Skemmtidagskrá var vegleg og var hún í höndum heimafólks. Brekkusöng stýrðu þeir Hjörleifur Már Jóhannsson og Eiður Eyjólfsson og var vel tekið undir hjá þeim félögum.
Keflvíkingurinn Valdimar Guðmundsson tók nokkur lög og Baldur og Júlíus, synir Rúnna Júll komu fram með Diljá Pétursdóttur söngkonu og hljómsveit. Sveitin flutti keflvísk lög sem langflestir þekkja og fjölmenntu gestir á dansgólfið og tóku undir í lögunum. Unga hljómsveitin Nostalgía lokaði kvöldinu.
Hér má ekki gleyma flutningi annáls Keflavíkur og fóru þeir félagar sem hann gera mikinn og fengu hjálp frá gervigreindinni við hin ýmsu mál sem vakti mikla kátínu. Lokalag annálsins - „Sönn í Keflavík“, með texta annálshöfundarins Sævars Sævarssonar, og söng Sigurðar Eybergs Jóhannessonar og Kórs Keflavíkurkirkju, hitti í mark eins og kvöldið allt.
Hér fylgja nokkrar myndir og svo eru fleiri í myndasafni með fréttinni. Þá er einnig innslag með lokalaginu.
Þorrablót Keflavíkur 2026
