Reynir hafði betur gegn Víði í háspennuleik í Sandgerði
Það var boðið upp á stórleik og mikla spennu á Bronsvellinum nú síðdegis þegar Reynir tók á móti toppliði Víðis í 20. umferð 3. deildar karla. Yfir 600 áhorfendur (631) mættu á leikinn og sáu heimamenn snúa leiknum sér í hag á tveimur leiftursnöggum mínútum í síðari hálfleik.
Spennustigið var hátt fyrir leikinn þar sem Reynismenn þurftu á sigri að halda og stigin þrjú sem fengust í kvöld því gríðarlega mikilvæg.
Helstu atvik leiksins
• 19. mínúta: Ísak John Ævarsson kom gestunum í Víði yfir snemma leiks en gestirnir höfðu sótt stíft.
• 75. mínúta: Eyþór Örn Eyþórsson jafnaði metin fyrir Reyni S. með óverjandi langskoti langt utan af velli. Þetta var algjörlega óverjandi fyrir markvörð Víðismanna sem kastaði sér hátt í loft upp til að reyna að handsama knöttinn.
• 76. mínúta: Aðeins mínútu síðar fullkomnaði Jordan Smylie endurkomuna með því að skora sigurmark Reynismanna.
Bæði lið sóttu stíft en fleiri urðu mörkin ekki og montrétturinn er því í Sandgerði nú á Vitadögum en leikurinn var hluti af yfirgripsmikilli dagskrá bæjarhátíðarinnar. Veðrið lék við áhorfendur.
Staðan í deildinni og innbyrðis saga
Sigurinn er gríðarlega mikilvægur fyrir Reyni S., en liðið rífur sig upp úr 4. sætinu og stendur nú í 2. sæti deildarinnar með 39 stig. Víðismenn sitja áfram á toppnum með 42 stig þegar tveimur umferðum er ólokið.
Innbyrðis saga þessara grannaliða varð enn jafnari eftir leik kvöldsins. Liðin hafa nú unnið 12 leiki hvort gegn öðru ásamt því að hafa gert 9 jafntefli.
