Nýtt vinnufyrirkomulag hjá Reykjaneshöfn fest í sessi
Bætir vinnuaðstæður og þjónustu
Atvinnu- og hafnarráð Reykjanesbæjar hefur samþykkt að gera nýtt vinnufyrirkomulag hjá Reykjaneshöfn varanlegt, auk þess sem tímabundið starf var gert að fastráðningu.
Breytingarnar voru upphaflega samþykktar til reynslu í janúar á þessu ári vegna aukins álags sem hlýst af vaxandi hafnarstarfsemi. Eldra vinnufyrirkomulag mætti ekki lengur þörfum hafnarinnar og var ákveðið að fjölga almennum starfsmönnum úr þremur í fjóra með tímabundinni ráðningu.
Eftir nokkurra mánaða reynslutíma er það sammála mat starfsmanna og stjórnenda að nýja fyrirkomulagið hafi reynst vel og fært umtalsverðar kjarabætur í vinnuaðstæðum ásamt því að efla þjónustugetu hafnarinnar. Atvinnu- og hafnarráð var einhuga um að festa fyrirkomulagið í sessi til framtíðar og samþykkti að fastráða starfsmanninn sem réðst til hafnarinnar í febrúar síðastliðnum.
