Útboð í Njarðvíkurskógum en íbúasamráð í Höfnum

Skipulagsráð Reykjanesbæjar fjallaði um tvö erindi varðandi tjaldstæði í sveitarfélaginu á síðasta fundi sínum. Niðurstöður ráðsins voru ólíkar eftir svæðum, en grænt ljós var gefið á áframhaldandi undirbúning í Njarðvíkurskógum á meðan áform í Höfnum kalla á nánara samráð.

Tjaldstæði í Njarðvíkurskógum

Óskað var eftir heimild til að bjóða út uppbyggingu og rekstur á tjaldsvæði í Njarðvíkurskógum. Um er að ræða 1,8 hektara afþreyingar- og þjónustusvæði (reit AF4 í aðalskipulagi) sem staðsett er í næsta nágrenni við íþrótta- og útivistarsvæði bæjarins.

Skipulagsráð samþykkti erindið fyrir sitt leyti og veitti heimild til að hafist verði handa við að vinna tillögu að deiliskipulagi fyrir tjaldsvæðið.

Áform í Höfnum bíða endurskoðunar aðalskipulags

Ráð tók einnig fyrir endurtekið erindi frá Sveini Enok Jóhannssyni, sem óskaði eftir afnotum af landi í eigu Reykjanesbæjar undir tjaldstæði fyrir ferðavagna í Höfnum.

Fyrirhuguð uppbygging á svæðinu krefst breytinga á aðalskipulagi Hafna. Skipulagsráð benti á að slík breyting þyrfti að vinnast í samráði við íbúa svæðisins og vísaði nánari úrvinnslu málsins til heildarendurskoðunar á aðalskipulagi sveitarfélagsins.