Njarðvík lagði Hauka í Hafnarfirði

Njarðvíkingar gefa ekkert eftir í toppbaráttu Subway-deildar kvenna í körfuknattleik. Njarðvík mætti Haukum í kvöld og vann góðan sigur, 70:78. Á sama tíma hafði Fjölnir betur gegn Keflavík, 99:83. Njarðvík er á toppi deildarinnar en Fjölnir er í öðru sæti með jafnmörg stig.

Haukar - Njarðvík 70:78

(19:20, 18:22, 12:17, 21:19)

Haukar byrjuðu leikinn betur og náðu átta stiga forystu snemma í fyrsta leikhluta (10:2) en Njarðvíkingar unnu þann mun upp og leiddu eftir leikhlutann með einu stigi (19:20). Jafnræði var á með liðunum en um miðjan annan leikhluta náðu Njarðvíkingar að byggja upp forskot og leiddu í hálfleik með fimm stigum (37:42).

Seinni hálfleikur var í járnum og aldrei varð munurinn á liðunum mikill en Njarðvík hleypti Haukum aldrei upp að hlið sér og hélt forystunni út leikinn þótt litlu munaði oft á tíðum. Haukar náðu að minnka muninn í þrjú stig (63:66) þegar fjórar mínútur voru eftir og í tvö stig á lokamínútunni (70:72). Njarðvíkingar skoruðu næstu stig af vítalínunni (70:74) og því næst stal Aliyah Collier boltanum, sendi á Láru Ösp Ásgeirsdóttur sem setti boltann niður og Njarðvík komið með sex stiga forskot og leikurinn að renna út. Njarðvík bætti tveimur stigum við og hafði mikilvægan sigur í toppbaráttunni, 70:78.

Diane Diéné Oumou var með sautján stig, sjö fráköst og tvær stoðsendingar en Ailyah Collier fimmtán stig, sautján fráköst og þrjár stoðsendingar auk 29 framlagspunkta. Njarðvíkingar skiptu stigasöfnuninni á milli sínn og þær Vilborg Jónsdóttir, Lára Ösp Ásgeirsdóttir og Lavína Joao Gomes De Silva gerðu þrettán stig hver.

Fjölnir - Keflavík 99:83

(21:16, 22:15, 24:33, 32:19)

Keflavík lenti undir í byrjun leiks og Fjölnir hafði tólf stiga forskot í hálfleik (42:31). Með frábærum kafla í þriðja leikhluta tókst Keflavík að komast yfir (55:57) og liðin skiptust á forystunni út þriðja leikhluta en Fjölnir leiddi 67:64 fyrir fjórða leikhluta.

Fjölnir gerði níu fyrstu stig lokaleikhlutans og komust í tólf stiga forystu (76:64) sem var of mikill munur fyrir Keflvíkinga til að vinna aftur og voru þær yfirkeyrðar í fjórða leikhluta. Lokatölur 99:83 og Keflavík situr í fimmta sæti deildarinnar með fjórtán stig.

Daniela Wallen var sem fyrr atkvæðamest í liði Keflavíkur með 31 stig, tíu fráköst, þrjár stoðsendingar og 36 framlagspunkta. Anna Ingunn Svansdóttir heldur áfram að leika vel en hún var með 26 stig í kvöld.